اصل واکدار آتیان خواست ءِ کہ زو گچین کاری کرفر، شیخ رشید

اسلام آباد : مسکوہی وزیر داخلہ شیخ رشید پارینے کہ ملک انا اصل واکدار آتیان خواست ء ِکہ زو گچین کاری کرفنگے۔ ملکی ویل آتا اسٹ انگا ایسر زُو گچین کاری تیٹی تخوک ءِ۔ آرمی چیف نا بارو اٹ غیراخلاقی وڑ اٹ ہیت کروک آتا برخلاف بایدے نوٹس ہلنگے، پاکستان ءِ بچفوئی ءِ تو گچین کاری کرفوئی تمک۔ اسلام آباد ہائی کورٹ نا پیشن آ صحافی تا سوج آتا ورندی ءِ ترسا شیخ رشید پارے کہ مچ آ قوم ءِ کلہو تننگ خواوہ کہ گچین کاریک مننگ ءُ، تیاری کبو۔ فوج انا ترجمان مریم و نوازشریف ءِ پارینے، عمران خان فوج ءِ سیاست اٹی گرپننگ ءِ۔ شیخ رشید پارے کہ عدالت آ پت کینہ، و بایدے اوڑا پت مرے۔ عدالت آتیا پت متو تو ملک چلینگ کپک۔ عمران خان عدالت آتا بابت ہیت چندی وڑ تیٹی پاننگانے۔ صحافی سوج کرے کہ گیٹ نمبر4 نم کن بند مسنے؟ ہراڑا شیخ رشید پارے کہ کنا پاک فوج اتون تعلقداریک گچین ءُ، و دافک برجا سلرہ۔ کنے دا ہیت آ گمر ءِ۔ او پارے کہ 42 وزیر تیان 20 آن زیات کیس ءُ، دا بابت ہائی کورٹ آ بسنٹ، ہندن ءُ وزیر داخلہ اس اتنگانے ہرا 22 بندغ نا خونی ءِ۔ اے این ایف عدالت اٹی یانزدہ شاہد پاریر کہ رانا ثنااللہ منشیات بہا کیک۔ وزیراعظم، وزیراعلی پنجاب و وزیرداخلہ کیس آتیٹی تینے آ ڈوہ بیٹ کننگ کن الیتوس۔ کنا ایلم نا مار ہڑدے دھکہ کننگ ءِ، و ذلیل و خوار مننگ اٹی ءِ۔ اصل ویل دادے کہ نابود ءُ حکومت اسے۔ مچ آ قوم ءِ کلہو تننگ خواوہ کہ گچین کاری مننگ ءِ تیاری کبو۔

(آن لائن)