نواز و شہباز شریف ملک انا اصل میر جعفر و میر صادق آک ءُ، عمران خان

اسلام آباد : چیئرمین تحریک انصاف عمران خان پارینے کہ مچ آ شریف خاہوت دروغ تڑک، نواز شریف و شہباز شریف دا ملک انا اصل میر جعفر و میر صادق آک ءُ، منورہ واقعہ غا ایف آئی آر کاٹ کروک آک شکی مفسہ، شہباز شریف نا قومی اسمبلی ٹی تران نا ورندی ءِ جلسہ ٹی ایتوہ، دافک امریکہ نا کمک اٹ سازش کریر، اسلام آباد اٹی کارندہ غاتیان تران کرسا عمران خان پارے کہ دافک امریکہ نا کمک اٹ حکومت اس بٹیر، کنا ہننگ و اوفتا بننگ آن کل آن زیات بھارت خوش مسنے۔ ڈونلڈ لو کون آ انڈر سیکرٹری پرمان کننگ ءِ کہ تیان پرائم منسٹر ءِ اینک کبو۔ ننا جند ٹشوپیپر آنبار کاریم اٹ بسن۔ عمران خان پارے کہ کل ہیت آتے مہالو آن پاننگ اُٹ۔ الس غیرتی ءِ، دلیر ءِ، کرپٹ و لغور آک دا قوم انا زی آ تولوک ءُ۔ کنے پاننگے کہ ہرا ملک انا وزیر اعظم لندن نا کل آن کبین انگا علاقہ ٹی رہینگک۔ دا ملک اٹی دزی کن بریرہ، دا میرجعفر و میر صادق ءُ۔ اول اوفک مشرف آن این آر او ہلکر، دافک ملک ءِ دا حالیت آ سر کریر۔ چیئرمین تحریک انصاف نا پاننگ ئس کہ سخت انگا وخت اٹی تو پی ٹی آئی ءِ حکومت رسینگا، 20 ارب ڈالر نا پیشن نا نسخان نن کن اِلاسر، نن کل آن زیات ڈالر ایسن، ایکسپورٹ آتے ودفین، ملک اٹی پنچ بھلو فصل انا ریکارڈ پیداوار مس۔ ننا دور اٹی کل آن کم بے روزگاری مس۔ کورونا نا سوب آن مچ آ دنیا زہمی مس۔ نن کورونا ٹی زرگزران ءِ ہم بچفین۔ و مخلوق ءِ ہم۔ او پارے کہ نم تو ڈونلڈ لو تون اوار مرسا سازش کریرے۔ و اسہ حکومت اسے بٹیرے۔ آئی ایم ایف نا رپورٹ ئس کہ پاکستان گچین شونداری نا کنڈ آ گام کننگ ءِ۔ مچ آ پاکستان نا کرمنل آک پارلیمنٹ اٹ تولوک ءُ۔ عمران خان نا زند مرک پاکستان اٹی ءِ۔ کان ہچ ءُ جائیداد اس پیشن ملک اف۔ ای سیاست کپرہ، ای اوفتا برخلاف جہاد کننگ اُٹ۔ کنا ہننگ و اوفتا بننگ آن بھارت اٹ خوشی مننگ ءِ۔ تینے آ کروک مقدمہ غاتا ہیت ءِ کرسا عمران خان نا پاننگ ئس کہ نن ہچ ملک ءِ نسخان رسیفپنہ۔ ننا برخلاف ایف آئی آر کاٹ کننگ آ دافک شکی ہم مفسہ۔ شہباز شریف کل آن زیات پولیس مقابلہ غاتیٹی مخلوق ءِ کسفینے۔ او پارے کہ نن بیرہ دا خوانہ کہ گچین کاری مرے۔ ای 20 تاریخ آن پد کال ایتوہ۔ ہرا اسلام آباد آ بننگ کپک، تینا علاقہ ٹی پیش تمے۔ داڑے بننگ آن پد انت کروئی ءِ، ای ولدا پاوہ کہ انت سجفینٹ۔ دافک پارہ کہ عمران خان ءِ ہلینہ، دافک انت کہ پلان کیر اوفتا جند انا لخ اٹی تمک۔

(مانیٹرنگ ڈیسک)