بارکھان برمتہ کیس، گراں ناز عدالت اٹ بیان ریکارڈ کرفے

کوئٹہ : بلوچستان نا ضلع بارکھان اٹ مسہ شاری ناخون نا دوبہ ٹی دزگیر صوبائی وزیر مواصلات عبدالرحمن کھیتران و خان محمد مری نا اُرائی گراں ناز ءِ جوڈیشل مجسٹریٹ نا مون آ پیش کننگا‘ حوال نا رد اٹ گراں ناز جوڈیشل مجسٹریٹ صائمہ نسرین نا مون آ سردار عبدالرحمن کھیتران نا ساڑی گری ٹی تینا بیان ءِ ریکارڈ کرفے‘ بیان آن پد کرائم برانچ پولیس اودے پدی دَرے وخت اس کہ سردار کھیتران ءِ ہم پبی رکھی بست وبند آتے ٹی عدالت آن پدی دننگا۔ یات سلے کہ پولیس 22 فروری آ مسہ شاری ناخون نا شک اٹ صوبائی وزیر مواصلات عبدالرحمن کھیتران ءِ دزگیر کریسس۔ بلوچستان پولیس نا ترجمان پاریسس کہ سردار عبد الرحمن کھیتران ءِ بارکھان اٹ مسہ بندغ ءِ کسفنگ نا دوبہ ٹی دزگیر کننگانے‘ او پاریسس کہ اسپیشل انوسٹی گیشن ٹیم صوبائی وزیر آن جاست پاست نا بناءِ کرینے‘ یات سلے کہ 23 فروری آ پولیس مجسٹریٹ آن دوبہ دار عبدالرحمن کھیتران نا 10 دے انا ریمانڈ نا خواست کریسس‘ ہرادے امنا کرسا عدالت دوبہ دار ءِ 10 دے انا ریمانڈ آ پولیس نا دوٹی تسوسس۔ یات سلے کہ بلوچستان نا چندی علاقہ غاتے ٹی کروک کاروائی تے ٹی لیویز کارندہ غاک خان محمد مری نابرمتہ کروک خاہوت ءِ پدی ایسوسس‘ ہرافتے ٹی اونا اُرائی‘ مسہ مار و اسہ مسڑ اس اوار ءِ‘ دا بابت رسالدار میجر کمانڈر کیو آر ایف لیویز شیر محمد مری پاریسس کہ اسہ چناءِ دکی وخت اس کہ ایلو چناتے بارکھان و ڈیرہ بگٹی نا سیمی علاقہ غان چھاپہ خلسا پدی اتنگا۔

(آن لائن)