آئی ایم ایف تون ہیت آک پک مننگ نا خڑک آٹو، جمیل احمد

اسلام آباد : گورنر اسٹیٹ بینک قائمہ کمیٹی برائے خزانہ ءِ پارے کہ مالی کوڑی تیا زور پیشن نا فنانسنگ نا کم مننگ نا سوب آن ءِ‘ آئی ایم ایف نا جاچ اٹ ہُرے مننگ ناسوب آن پیشن نا فنانسنگ سلیسنے‘ آئی ایم ایف تون ہیت آک پک مننگ ناخڑک آٹو‘مالی کوڑیک 4.3 ارب ڈالر ءُ و اسہ ہفتہ ٹی یک ونیم ارب ڈالر ودانے‘ وام تے پدی تننگ نا سوب آن ہم مالی کوڑیک کم مسنو‘ اِرا مسہ تُو اٹ کبینی نا زور سلک و برجامالی سال اٹ کبینی 26.5درسَد مریک۔ سینیٹر سلیم مانڈوی والا نا کماشی ٹی سینیٹ نا قائمہ کمیٹی خزانہ نا دیوان چار شنبے نادے پارلیمنٹ ہاؤس اٹ اڈہلک‘ ایس سی او کمامدار آک بریفنگ ترسا کمیٹی ءِ پاریر کہ فنڈ مفننگ ناسوب آن داسو دنیور رابطہ کاری نا ڈٹ پدتمانے۔ کمامدار آک پاریر کہ 2 ارب روپئی نا ڈٹ آ داسکان 59 درسَد کاریم پورو مسنے‘ وزارت ڈٹ بندی نا کمامدار آک بریفنگ ترسا پاریر کہ برجا مالی سال اٹ 30 کروڑ روپئی تخنگاسس و داڑا 5 کروڑ 80 لکھ خڑچ کننگا‘ نن 12 کروڑ روپئی جاری کرینن اول اٹ ہمو خڑچ کننگر۔ ایس سی او کمامدار آک پاریر کہ اِرا ہفتہ مست 12 کروڑ روپئی جاری کننگا او خڑچ کننگرہ۔ چیئرمین کمیٹی سوج کرے کہ ہراتم نم پیسہ غاتے خڑچ کپیرے تو نمے پین پیسہ امر رسینگک۔؟ ٹھیکیدار آتے پیسہ غاتے ایتبو تاکہ نمے پین پیسہ رسینگ کے۔ کمیٹی ایس سی او کمامدارآتے پیسہ تننگ آن پد رپورٹ جمع کرفنگ نا پرمان کرے‘ دیوان اٹ مالی کوڑی تے ٹی کمتی‘ کبینی ٹی ودکی‘برآمد آتے ٹی کمتی و بڑز کچ انا باندات آ ہم سجفنگا۔ کمیٹی نا باسک سینیٹر محسن عزیز پارے کہ اسہ حکومتی عہدیدار اس ہم داڑے ساڑی اف گڑا دا باندات آتیا امر ہیت مننگ کیک۔ سود انا کچ اٹ کمتی کننگے گڑا نم 170 ارب روپئی دوئی کننگ کیرے‘ سود انا کچ اٹ ودکی آن کبینی ءِ امر کم کننگ مریک‘ پاکستان کون آ زرگزران ءِ داڑان فائدہ مننگ کپک‘ کبینی تاریخ نا بڑزانگا کچ آٹے و 1971 نا جنگ آن پد ہم کبینی داخس متویسس۔

(آن لائن)