ارباب خدائیداد خان کاسی نا کُٹالی (2)

محبوب شاہ

0

Get real time updates directly on you device, subscribe now.

 

ارباب خدائیداد خان کاسی نا شخصیت اونا مڈی و اونا جائیداد نا آہری اَلو۔ او تینا نرم مزاجی و تینا سخاوت نا پن اٹ ارباب خدائیداد پاننگاکہ۔ او مدام تینا قوم ءِ بندغی نا درس ترسا پاریکہ کہ کہ خوش مبو، خوشی کبو، غریب آتیا خیر و خیرات نا پھل چٹ ایتبو، بدنیتی نا کڑدار آن تینا دامن ءِ بچفبو۔ گندہی و گندہی کننگ آن کل آن بھلا نسخان دا مریک کہ بینگنی و ملاسی نا بلہ خلق آتیٹی با بٹک، بلکہ تغ انا خماری آ بلبل ہم بال کیک۔ دنزی آ نوکاپ رغ تے ترخفک، ملی نا زیار خن تیان چلک خلیک۔ کرار کرار زند انا خوشیک غم اٹ بدل مریرہ۔ ویل آک یکجا

مرسا عمر ءِ گٹو کیرہ۔ ہراسٹ آن بد درورے یا بدنیتی کرورے اوفتے تو سما تمپک، نئے اونا نت و دُو اس خڷ کیک، نئے کاٹم تے ترکک، نئے اودے اِڷ کیک، ولے نم ہندا کل ناجوڑی تا درمان دارو پٹورے چٹورے۔

ارباب خدائیداد خان تینے کاسی قبیلہ تون اوار کاسی قلعہ نا داپار ایپار نا غریب و ایلو بلوچ دوست تینائی تے کن وقف کریسس۔ او ہر اسٹ نا خذمت ءِ انسانیت ناپن آ کریکہ۔ ہر اسٹ نا جول ءِ خوشی آن پر کریکہ۔ ہر اسٹ نا ویل ڈکھ آتے تینا بج آ تخاکہ، جنگ و جھیڑہ، غصہ و ناراضگی تا خازگ آتے است آتا مونی تے عرق گلاب اٹ سلنگ نا عمل ءِ عبادت پاریکہ۔ راست پارینو، شون و شرحالی تالان کروک ءُ کماش اسے نا ہچ ءُ ذات اس اف، ہچ ءُ خاہوت اس اف، تینا داپار ایپار رہینگوک آ بندغ ءِ تینا ذات و تینا خاہوت و تینا اولیاد پاہک۔

ارباب صاحب سخاوت تون اوار شار انا گچین ءُ مفکر و ہوش مند ءُ متبر ءُ بندغ اس ئسکہ۔ اونا مہر اونا بندغی ہر بندغ ءِ چٹ اٹ چکاکہ، قوم و سیال آتے اِلے دشمن آتے ہم سنگت کریکہ۔ دا رنگ اونا بندغی نا تخلیقی و سادہ ءُ عکس اس ئسکہ۔ جوان ءِ او نوشتکار شاعر و افسانہ نگار اس اَلو، آخا تو براہوئی ادب نا ادبی آ ہلاکو خان آنبار قلم ءِ پین اسے نا کوپہ غا تخسا چندی تے کر و کور کریکہ۔ ارباب زند انا اسہ بھلو بشخ اس بزغر شوان و مزورکار آتا شرحالی کن گدریفے، اونا جوانی تا کِسہ غاک تاریخ نا پلاٹ جوڑ مسنو۔ سید خیر جان راست پارینے انسانیت نا بھرم ءِ انسان تینا ہمو بندغ آ بشخنگ کیک ہرانا سینہ ٹی دریابی ءُ است اس مرے۔

ارباب ءِ پشتو زبان آن بیدس براہوئی، بلوچی زبان بھاز دوست ئس۔ او اسہ وخت آ براہوئی و فارسی زبان جوان پاریکہ۔ اینو ہم کاسی قبیلہ نا گیشتری بندغ آک براہوئی زبان اٹ ہیت کننگ کیرہ۔

اسہ وخت اس دُمڑ قوم انا داڑیل آک وخت وخت اس کاسی قلعہ غا جلہو کرسا لٹ و پل کریرہ، ارباب خدائیداد خان اوفتا دا عمل آن بھاز فریشان ئس۔ او دا گوریچ نا مون ءِ توننگ کن لہڑی، کرد، سید، قبیلہ غاتے کاسی قلعہ نا خڑک آ آباد مننگ کن پارے۔ ہرکس ءِ تین کن مفت اُرا تفنگ نا موکل تس۔ ہرا کہ اینو ہم کاسی قلعہ نا خڑک آ کیہی نسل آتیان بلوچ اسٹریٹ نا پن اٹ آباد ءُ۔ اوفتا آباد مننگ آن پد ہرکس تین کن چنکو چنکو اسہ اُرا کچہ ءُ کوٹھی تفے۔ وخت وخت اس شام انا ارباب خدائیداد خان حال حوال کننگ کن بسکہ، چنکا چنکا کوٹھو آتے خناکہ، پاریکہ جائی براہوئی اُرے، نما خاندانی اٹ ہچ ءُ شک اس اف۔ ای نمے موکل تسنٹ نم تین کن بھلو بھلو قلعہ تفبو، نم کنا کوپہ کنا ایلمک اُرے، پین اس مسکہ بیدس موکل آن دیوال خلککہ۔ دافک اودے پاریرہ، ارباب صاحب نن نا منتوار اُن، کوزہ گیر افن۔ تینا وڑ دیوال خلین، بلکہ نن نا کمک کن بسنن۔ (دیگ انا بائی اف، ڈو ءِ شرم برے) ایہن ہم نن تیرمہ کن دشت اٹ خولم دسنہ، دو انا مزوری کینہ۔ سیڷ انا یخ انگا دے تے داڑے گدریفنہ، نن کن دا چنکا کوٹھو آک پیہن آ ماڑی تیان کم افس۔ اینو اگہ بلوچ اسٹریٹ نا ہر مکان ءِ کچ کر تو گیشتری سَے سد چار سد فٹ آن، زیات مریر ہم پانزدہ سد فٹ آن زیات افس۔

سنگتی و سیالداری ٹی پدی چک خلنگ المی ءِ، سما تمے کہ دیر نے تون سلوک ءِ دیر پدی ہڑسینگانے۔ سانگ و سانگ بندی آن پد کاسی تا بلوچ آتتون خونی رشتہ غاک جوڑ مسر۔ اسہ ایلو نا ہر غم و شادے ٹی اوار ءُ۔ دا اواری نا بنداو ءِ ارباب خدائیداد خان کاسی تخا۔ دا اونا مہر آتا گدان ءِ۔ ہراٹی نن اسہ ہند غم و شادے نا کونٹ شاغنہ۔ اسٹی نا دا ہنر ءِ ننے ارباب نا مجلس و ننا قومی آ کلچر ہیل تس۔

ارباب خدائیداد کاسی چکر و بوگ شوگ نا مجلس آتا شوقی ئس۔ سنگتی و پکنک آتیٹی بلوچ ورناک اودے بھاز دوست ئسر۔ تُو اِرا تُو اٹ اسہ وار کل ءِ مچ کریکہ پاریکہ، ورناک سنج کبو ہچ آتے، ہوا خوری نا چس ءِ ہلین۔ اے کنا سنگت ءِ توار کبو، سازندہ و شاعر آتے ہرفبو، کننگ و کنفنگ نا گڑا تے بڈ کبو۔ دیر انا کلی تے رند پہ رند سلفبو۔ ہچ آتا قطار ءِ، ہتم نا تہو اٹ زباد تالان مننگ ءِ۔ ببو کہ نوکاف نا رہی آ گدان تے چر اٹ خلین، شاد انا ہیڷ آتیان مست کُٹ آتے گواڑخ و شوشنگ/ شمشاک آن پر کین۔ ہتم نا رنگی آ شام اٹ پھل آتا گند ءِ تالان مننگ آن مست تینا ہروہ اٹ اوڑدہ کین، شونم نا پالن آ خرسی تیا کپلیٹ کین۔ مہر و مریبت اٹ زیبل آتا زیبائی نا گپ خلین۔ شاعر آتیان وفاداری نا شئیر خلفن۔

ہفتئی تلار
تاک: 33
10-04ستمبر 2021ء
پنہ: 05

 

Get real time updates directly on you device, subscribe now.

Leave A Reply

Your email address will not be published.