حکومت نا لہڑی جاموٹ جھیڑہ کن حکومتی کہول آ گام گیج نا فیصلہ
قبائلی جھیڑہ غاتا ایسری ءِ اولیت تننگک، مینگل و سناڑی قبیلہ نا جھیڑہ نا ایسری کن ہم حکومتی کہول آ کوشست کننگاسس
کوئٹہ : حکومت بلوچستان لہڑی و جاموٹ قبیلہ نا نیام اٹ جھیڑہ ءِ چٹفنگ کن حکومتی کہول آگام گیج کننگ نا فیصلہ کرینے‘ وزیرداخلہ بلوچستان میر ضیاء اللہ لانگو پارینے کہ قبائلی جھیڑہ غاتا ایسری ِ اولیت تننگک‘ مست آنبار نن خوانہ کہ ہرا وڑ مینگل و سناڑی قبیلہ نا جھیڑہ ناایسری کن کوشست کننگاسس ہمو وڑ ایلو جھیڑہ غاتے ایسر کننگ کن ہم کوشست کننگ انگ ءِ تاکہ قبائلی جھیڑہ غاک خیر خوشی اٹ ایسر مریر‘ ہرانا سوب آن بلوچستان اٹ آخبتی و پک امن مرے و دا ہم ہمو چر انا کڑی اسے و دا رد اٹ لہڑی و جاموٹ قبیلہ نا نیام اٹ قبائلی جھیڑہ ءِ ایسر کننگ کن حکومتی کہول آ کوشست آتا بناءِ کننگانے۔ او پارے کہ پیشن مننگ ناسوب آن اسہ ارا دے اٹ دا رد اٹ ہڑتوم آ پڑک آتتون اوڑدہی تا چر انا بنا ہم کننگک تاکہ باندات ءِ خیروخوشی اٹ ایسر کننگ مرے و پارے۔ او پارے کہ بلوچستان پین کشت وخون سگنگ کپک۔ وزیرداخلہ بلوچستان میر ضیاء اللہ لانگو مستی پارے کہ حق وانصاف و روایت آتا وڑ اٹ قبائلی جھیڑہ غاتا ایسری وخت انا کل آن اہم انگا گرج ءِ۔
(آن لائن)