دہشتگردی نا توننگ کن اوغان حکومت تون کمک کروئی تمک، آرمی چیف

راولپنڈی : آرمی چیف جنرل سید عاصم منیر نا چینی وزیر خارجہ چن گانگ و اوغان وزیر خارجہ امیر خان متقی تون اوڑدہی تے ٹی تین پہ تینی دفاعی و سکیورٹی کمک ءِ پین سوگو کننگ آامنائی کننگانے۔ آرمی چیف ناکنڈآن سی پیک ڈٹ اکن پورو مخ تفی نا اعادہ ہم کننگا وخت اس کہ اوغان وزیر خارجہ پاکستان تون خڑک انا تعلقداری تے المی گوندا۔ پاک فوج انا ترجمان نا رد اٹ پاکستان اٹ سَے فریقی مذاکرات اٹ بشخ ہلنگ کن بروک چینی و اوغان وزیر خارجہ آرمی چیف جنرل سید عاصم منیر تون جتا جتا اوڑدہی کرے۔آئی ایس پی آر نا رد اٹ آرمی چیف جنرل سید عاصم منیر چینی وزیر خارجہ چن گانگ تون اوڑدہی نا وخت آ علاقائی سلامتی و دفاعی کمک تون اوار تین پہ تینی استخواہی تا امور تیا ہیت وگپ کننگا۔ آرمی چیف جنرل سید عاصم منیر اوڑدہی نا وخت آ چین پاکستان اسٹریٹجک تعلقداری تیکن پاکستان نا عزم انا درشانی ءِ کرے‘ آرمی چیف جنرل سید عاصم منیر چین نا بیلٹ اینڈ روڈ انیشیٹو نا اہم انگا بشخ چین پاکستان اکنامک کوریڈور (سی پیک) ڈٹ اکن ہم پورو مخ تفی نا باور کرفے۔ آرمی چیف جنرل سید عاصم منیر علاقائی وجہانی امور آ پاکستان کن چین نا مخ تفی نا ستاءِ ہم کرے۔ چینی وزیر خارجہ کن گانگ ایلم ملک آتا نیام اٹ اسٹریٹجک تعلقداری تا اہمیت ءِ پاش کرے و سی پیک آ مروک پیش رفت آ است جمی نا درشانی ءِ کرسا اونا وخت آپورو کننگ کن چین نا عزم انا درشانی ءِ کرے‘ او علاقائی امن وسوگوی ءِ برجا تخنگ کن پاکستان نا کوشست آتا ستاءِ ہم کرے‘ ہڑتوم آ شخصیت آک ڈیہہ اٹ سکیورٹی نا مون آبروک حالیت آتیا ہم گپ وتران کریر۔ آرمی چیف جنرل سید عاصم منیر ڈیہہ اٹ امن وسوگوی کن چین نا کڑدا نا ستاءِ ہم کرے‘ ہڑتوم آکنڈآن اسیجائی سکیورٹی چیلنج آتتون گچین وڑ اٹ مون تننگ کن دفاع و سلامتی نا بشخ آتے ٹی تینا ساڑی کمک ءِ ودفنگ آ امنا کننگا‘ اوڑدہی نا دا ٹک آ ایسر مس کہ ہڑتوم آکنڈآن پاکستان و چین نا نیام اٹ ہر آزمائشت ءِ پوروکروک سنگتی ءِ پین سوگو کننگک۔ داکان گڈ آرمی چیف جنرل سید عاصم منیر و اوغان قائم مقام وزیر خارجہ تین پہ تینی امور تیا گپ وتران کریر وخت اس کہ علاقائی سلامتی، بارڈر مینجمنٹ و ساڑی سکیورٹی چاگڑد اٹ گچینی کن تین پہ تینی سکیورٹی میکانزم ءِ جوان کننگ نا پہلو تیا گپ وتران کننگا۔ آرمی چیف جنرل سید عاصم منیر دہشت گردی و انتہا پسندی نا اسیجائی چیلنج آتتون گچین وڑ اٹ مون تننگ کن ہڑتوم آ ایلم ہمسائے ملک آتا نیام اٹ کمک ءِ ودفنگ آ زور شاغا‘ او تین پہ تینی استخواہی تا امور تے ٹی اوغان عبوری حکومت نا کنڈآن پورو مخ تفی و عزم انا گرج آ زورشاغا۔ اوغان وزیر خارجہ متقی اوغانستان نا الس کن پاکستان نا خذمت آتاستاءِ کرے و دااہم کڑدار ءِ امنا کرے ہرا پاکستان اوغانستان اٹ امن وشونداری ٹی کمکاری کن کڑد ادا کننگ اٹی ءِ‘ او علاقہ ناسوگوی و شونہالی کن پاکستان تون اواری اٹ کاریم کننگ نا استخواہی تا درشانی ہم کرے‘ ہڑتوم آ کنڈآن تین پہ تینی تعلقداری تے سوگو کننگ و اسیجائی گڑتی تا ویل آتے ایسر کننگ کن باقاعدہ رابطہ غاتے برجا تخنگ نا اہمیت آ امنا کرے۔آرمی چیف جنرل سید عاصم منیر سوگو‘ پرامن و شونہال اوغانستان کن پاکستان نا عزم انا درشانی ءِ کرے۔

(آن لائن)