ننے بہانہ نا جاگہ غا آئین نا رند ءِ دروئی تمک، چیف جسٹس
آئین نا رکھ ننا بنداوی زمواری تیٹی اوار ءِ، عدالت آک ایگزیکٹو آرڈر پاس کننگ کپسہ، جسٹس عمر عطاء بندیال
لاہور : چیف جسٹس سپریم کورٹ جسٹس عمر عطا بندیال پارینے کہ عدالت آک ایگزیکٹو آرڈر پاس کننگ کپسہ‘ عدالتی فیصلہ ءِ چیلنج کننگتو تو دا پک فیصلہ مریک‘ ننے پاننگانے کہ سیاسی جماعت آتا نیام اٹ مذاکرات مننگ اٹی ءِ‘ آئین نا رد اٹ کاریم کننگ ناگرج ءِ‘ بایدے ہچ ءُ بہانہ اس پٹنگپ۔ دا خیال آتا درشانی ءِ او مسکوہی چیف جسٹس آف پاکستان آنجہانی مسٹر جسٹس اے آر کارنیلیس کانفرنس اٹ‘دستور پاکستان اٹ اقلیت آتے دوئی حق‘ آتا سرحال آ تران کرسا کرے۔ چیف جسٹس پاکستان پارے کہ نن تینا سینئر جسٹس کارنیلئس ءِ خراج تحسین پیش کننگ کن مچ مسونُن‘ جسٹس کارنیلئس مجسم انصاف ئس‘اودے کانود تون اوار ایلو چندی علم آک ئسر‘اوپارے کہ جسٹس کارنیلئس دنیا نا بھلا ادارہ غاتیان تعلیم دوئی کرے‘ او سول سروس نا عہدہ غاتیا تعینات مننگ کریکہ ولے او کانود وانصاف نا بشخ ءِ گچین کرے‘ او اسہ جوان ءُ وکیل و سادہ ءُ بندغ اس ئس‘ ہندا سوب آن اونا زند جج آتیکن اسہ مثال اسے۔ جسٹس اے آر کارنیلیئس بھاز جوان خذمت کرے‘ او 23 سال اناوئی اٹ آئی سی ایس پاس کرے، جسٹس کارنیلیئس سپریم کورٹ ءِ 17 سال تس‘او جوڈیشل سسٹم کن سرسہبی نا نشان ئس۔ 1955 اٹ او گورنر جنرل نا اسمبلی تا پرغنگ ءِ غیرکانودی گوندا۔ پاکستان اٹ اقلیت آتے پورو مذہبی آجوئی ارے‘پاکستن اقلیت آتا حق آتا رکھ انا ضمانت ءِ۔او پارے کہ جج آتے ٹی انصاف کننگ کن جسٹس کارنیلیئس نا وڑ انا انصاف مرے۔ چیف جسٹس مستی پارے کہ پاکستان اِرا دہائی آن دہشتگردی نا گواچی ءِ۔ پاکستان اٹ دہشتگردی ناجنگ اٹ 80 ہزار آن زیات جان زیان مسر‘ عدالت آتا فیصلہ غاتا اخلاقی اتھارٹی مریک‘ آئین نا رکھ ننا بنداوی فرض آتے ٹی اوارءِ۔ جسٹس کارنیلیئس پاریسس کہ ایگزیکٹو آفیسر بنداوی حق آتا فیصلہ کننگ کپک۔ باندات آتے ہیت وگپ اٹ ایسر کننگے۔ ملکی شونداری نا اسٹ انگا کسر علم ءِ۔ او پارے کہ عدالت آک ایگزیکٹو آرڈر پاس کننگ کپسہ‘ پاکستان نا ہر شاری نا بنداوی حق آک اریر‘ و آئین نا رکھ ننا بنداوی فرض آتے ٹی اوار ءِ۔ او پارے کہ سپریم کورٹ انسانی بنداوی حق آتیا فیصلہ کننگ کیک۔ چیف جسٹس پارے کہ عدالتی فیصلہ اگہ چیلنج متو تو او پک و گڈیکو فیصلہ جوڑ مریک۔ جسٹس عمر عطا بندیال مچ آ ملک اٹ اسہ دے آ گچین کاری کیس انا بابت پارے کہ ننے پاننگانے کہ سیاسی جماعت آتا نیام اٹ مذاکرات مننگ اٹی ءِ‘ دا باندات اٹ ننا ہچ ءُ کاریم اس اف‘ سیاسی جماعت آتے احساس ارے کہ آئین ءِ شرف تننگ اوفتا زمواری ءِ‘ نن اوفتے سپورٹ کننگ کن سلوک ان نئے ایلو کنڈآ ننا فیصلہ ہمو مست اناءِ۔
(آن لائن)