عمران خان ایجہان نا دروغ تڑ و چمباز اسے، شہباز شریف

لندن : وزیراعظم شہباز شریف پارینے کہ عمران خان نت تیان کاٹم اسکان دروغ تڑ ءُ بندغ اسے‘ تحریک انصاف نا چیئرمین نا دروغک قوم انا مون آ پاش مننگ اٹی ءُ۔ پی ٹی آئی حکومت نا کنا برخلاف بیانیہ مچ آن مُچ دروغ ئس ہرانا سوب آن کناشرف ودا۔ لندن اٹ میڈیا تون ہیت وگپ کرسا وزیراعظم پارے کہ پی ٹی آئی حکومت کنا برخلاف ہرا بیانیہ ءِ تس ہرا دروغ اس ئس۔ نیوزی لینڈ تون اوار ایلو ملک آتے ٹی کنا برخلاف شاہدی مچ کننگ نا کوشست کننگا‘کیس اٹ کنا یلہ مننگ مچ آ پاکستان نا سرسہبی ءِ‘ عمران خان کنا برخلاف ہر وڑ ءِ کاریم اٹ ایس ولے بے سہب مس‘کیس انا سوب آن کنا شرف پین ودا۔ شہبازشریف پارے کہ عمران خان محسن کش ءُ بندغ اسے‘ اللہ ضرور اودے ہلیک۔ وزیراعظم پارے کہ اسکاٹش فرسٹ منسٹرحمزہ یوسف تون اوڑدہی بھاز جوان ئس‘ زوت زرکاری کانفرنس اڈتننگ اٹی ان ہراٹی واپاری‘ تعلیم‘ ٹیکنیکل ایجوکیشن تون اوار چندی بشخ آتے ٹی کمک کننگ آسجفنگک۔ داکان بیدس وزیراعظم شہبازشریف تینا ٹوئٹ اٹ پارینے کہ ڈیہہ انا اقتصادی لائخی تے ملنگ نا سیبو علاقائی امن وسوگوی نا بحالی تون گنڈوک ءِ۔ وزیراعظم پارے کہ اسلام آباد اٹ اڈ ہلوک 5میکو سے فریقی وزرائے خارجہ مذاکرات اوغان الس نا فائدہ ٹی اسہ پرامن‘ سوگو و شونہال اوغانستان ناو ڑ اٹ کاریم کننگ کن پاکستان و چین نا غیر متزلزل سیوت ءِ پاش کرے‘ اسہ جم و سوگو چکارنا کمک اٹ امن وسوگوی ٹی زرکاری بھرم تے پک کیک‘ہموفتتون اوار ہرا گام گیج آتا سرسہبی ہرافتا مسخت علاقائی رابطہ و راجی واقتصادی شونداری ءِ۔ داکان بیدس پاکستان و اسکاٹ لینڈ ہڑتوم آملک آتا نیام اٹ تاریخی تعلقداری تے پین سوگو‘ تعلی‘ ہنر نا شونداری و قابل تجدید وڑ تے ٹی اسیجائی ڈٹ و موسمیاتی بدلی نا چیلنج آتتون مون تننگ کن تین پہ تینی کمک ءِ ودفنگ آ امنا کرینو۔ حوال نا رد اٹ وزیراعظم شہباز شریف تون اونا دورہ لندن اٹ اسکاٹ لینڈ نا فرسٹ منسٹر حمزہ یوسف اوڑدہی کرے‘ وزیراعظم دا وخت آ اہم انگا عہدہ گچین مننگ آ اولیکو وزیر ءِ مبارکبادی تس و پارے کہ حمزہ یوسف نا گچین مننگ اسکاٹ لینڈ و مچ آ برطانیہ نا شونداری ٹی برٹش پاکستانی کمیونٹی نا اہم و مثبت کڑدار ءِ پاش کرے‘ او اودے تینا زمواری تے پورو کننگ اٹ سرسہب مننگ کن نیک انگا استخواہی تادرشانی کرے‘ ہڑتوم آراہشونک پاکستان واسکاٹ لینڈ نا نیام اٹ تاریخی تعلقداری تے پین سوگو کننگ آ امنا کریر‘ ہراٹی واپاری‘ زرکاری‘ تعلیم‘ دیر انا بست وبند و شمسی ٹیکنالوجی و الس نیام اٹ رابطہ غاک اوار ءُ‘ پڑک آک تعلیم، ہنر نا شونداری و ایلو وڑ انا اسیجائی ڈٹ آتے شو تننگ کن کن تین پہ تینی کمک اٹ کاریم کننگ آ ہم امنا کریر‘او پاکستان اٹ زرکاری ءِ وودفنگ کن اسکاٹ لینڈ نا پاکستانی پوریاگر تیان فائدہ ہرفنگ نا وڑ وڈول تے ہم پٹار‘او موسمیاتی بدلی نا چیلنج آتتون مون تننگ کن تین پہ تینی کمک اٹ کاریم کننگ آ ہم امنا کریر‘ دا رد اٹ پاکستان اسکاٹ لینڈ اٹ زرکاری کانفرنس اڈ تننگ و اسکاٹ لینڈ اٹ پاکستان نا توانائی نالائخی تے نشان تننگ کن جتاءُ اسہ روڈ شو اسے ناسلاہ تس۔ وزیر اعظم اسکاٹش حکومت نا تدوک آسال نوکاپ نا کمک اٹ کمک کننگ آ منت ہرفے۔ وزیراعظم حمزہ یوسف ءِ پاکستان نادورہ کننگ نا سلہ خلک‘ ہرادے او خوشی اٹ امنا کرے۔ حمزہ یوسف اسکاٹش نیشنل پارٹی ناکماش ءِ و اودے مارچ اٹ اسکاٹش پارلیمنٹ اسکاٹش حکومت ناکماشی ءِ کننگ کن گچین کیرسس۔ او پاکستانی ’ورثے‘ نااولیکو برطانوی شاری ءِ ہرا دا اعزاز ءِ دوئی کرینے۔

(آن لائن)