پاکستان و اوغانستان نا دہشتگردی نا برخلاف کمکاری ءِ شون تننگ آ امنا
Get real time updates directly on you device, subscribe now.
اسلام آباد: پاکستان و اوغانستان نا نیام اٹ وزرائے خارجہ نا کہول آ مروک مذاکرات اٹ دہشت گردی نا چٹفنگ‘ زرگزرانی شونداری و واپاری بشخ اٹ کمک ءِ ودفنگ آ امنائی کننگانے۔ ترجمان وزارت خارجہ نا رد اٹ وزیر خارجہ بلاول بھٹو زرداری یک شنبے نادے وزارت خارجہ ٹی اوغانستان نا قائم مقام وزیر خارجہ امیر خان متقی نا مہمانداری ءِ کرے۔ وزیر خارجہ بلاول بھٹو زرداری اوغان وزیر خارجہ مولوی امیر خان متقی نا کماشی ٹی اوغان ڈل ءِ دفتر خارجہ غا بننگ آبخیرکرے۔ وزرائے خارجہ ناکماشی ٹی ڈل آتا کہول آ مروک مذاکرات اٹ پڑک آک امن وسلامتی تون اوار واپاری و رابطہ غاتتون اوار تین پہ تینی گڑتی تا اہم انگا امور تیا پیدوار و جم تپ وگران کریر۔ وزیرخارجہ غاک پد ریسہ و عملی اختہ ئی تے برجا تخنگ نا استخواہی تا درشانی کریر۔ امن و سلامتی نا بابت وزیرخارجہ غاک دہشت گردی تون مون تننگ و تین پہ تینی کمک ءِ ودفنگ آ زور شاغا۔ ترجمان وزارت خارجہ نا رد اٹ تین پہ تینی و ٹرانزٹ واپاری نا بابت پڑک آک علاقہ نا اقتصادی انضمام و رابطہ غاتے ودفنگ نا مسخت ءِ مون آ دننگ کن واپاری نا کسر اٹ ساڑی اڑاند آتے اینک کننگ آ امنا کریر۔ پاکستان نا وزیر خارجہ وزارت خارجہ ٹی اوغان ڈل اکن پیشین نا ارغ کرے۔
(آن لائن)