چینی وزیرخارجہ نا دورہ پاکستان آن تعلقداریک سوگو مریرہ‘سینیٹر عبدالقادر

کوئٹہ : چیئرمین اسٹینڈنگ کمیٹی برائے پٹرولیم و رسورسز سینیٹر عبدالقادر پارینے کہ بیدس شک آن پاکستان و چین شراکت دار و آہنی ءُ سنگت ءُ۔ چینی وزیر خارجہ عزت چن گینگ نا عہدہ ءِ سنبھالنگ آن پد دا اولیکو ارا دے ئی دورہ پاکستان ہڑتوم آ ملک آتا تذویراتی رابطہ غاتے سوگو کننگ آن بیدس عملی کمک ءِ پین جوان، مربوط و کڑمب کیک۔ اوغان عبوری وزیر خارجہ امیرخان متقی ہم بڑزکو کہولی ڈل اتون سرکاری دورہ غا پاکستان آ بسنے۔ اوغان عبوری وزیر خارجہ امیر خان متقی نا بڑزکو کہولی دیوان تون اوار پاکستان آ بننگ ہڑتوم آ ملک و ڈیہہ انا حالیت نا بابت غیر معمولی ءُ اہمیت اس تخک۔ داڑے برجا مروک ءُ بیان اسے ٹی او پارینے کہ او اُست انا ہُب اٹ چینی و عبوری اوغان وزیر خارجہ امیر خان متقی ءِ پاکستان آ بننگ آ بخیر کیک۔ او پاکستان،چین و اوغانستان سہ ملکی وزرائے خارجہ تذویراتی مذاکرات ءِ بھاز اہم پن کرے۔ او پارینے کہ دورہ ٹی پاکستان و چین نا نیام اٹ تذویراتی کمک شراکت داری ءِ ودفنگک۔ و کثیر الجہتی کمک کن روڈ میپ اس جوڑ کننگک۔ اوڑدہی ٹی جہانی و علاقائی منظر نامہ غا ہیت وگپ بھاز اہمیت تخک۔ او پارینے کہ چینی وزیر خارجہ نا دورہ پاکستان ہڑتوم آ ملک آتا کمامدار آتا نیام اٹ پدریسہ ہیت وگپ نا اسہ وڑ اسے۔

(آن لائن)