آئی ایم ایف تون معاہدہ مٹھائی اس اَلو، ننا مجبوری ئس، وزیراعظم

اسلام آباد: وزیر اعظم پارے کہ ہراوخت گدرینگا اوڑا ماتن کننگ نا جاگہ غا ملک ءِ شونداری نا کنڈا دننگ کن سیاسی سرکڑدہ و ادارہ غاتے اواری اٹ کاریم کروئی مریک، شونداری نا ہرا سفر 2013آن بناکرسا 2017 ٹی چٹاسس اودے ولدا آن بحال کروئی ءِ۔ داخیال آتا درشانی ءِ او پنچ شنبے نادے آ داڑے تورغر۔ بونیر شاہراہ، بونیر۔کڑاکڑرابطہ سرنگ و تورغر بونیر آر۔سی۔سی پول انا بنداو ءِ تخنگ آن پد قبائلی سرکڑدہ و سلاہکار آتیان تران کرسا کرے۔ داوخت آ بنجائی وزیر حوالکاری و شینکاری مریم اورنگزیب، وزیراعظم نا سلاہکار انجینئر امیر مقام، مسلم لیگ (ن) نا راہشون کیپٹن (ر) محمد صفدر آن بیدس علاقہ نا سرکڑدہ و سلاہکار آتا بھلو کچ اس شاڑی ئسر۔ وزیراعظم علاقہ ٹی دانش اسکول، اِرا کالج آتا جوڑ کننگ، و کالاڈھاکہ ٹی بجلی نا فراوانی نا ڈٹ آتا پڑو ءِ کرے۔ وزیراعظم تورغر نا الس آباؤ اجداد نا قیام پاکستان وتربیلا ڈیم اکن تینا ڈغار تا قربانی نا ستاءِ کرسا پاریکہ دا قربانی تے گوجالنگ مفک۔ ملک اکن قربانی تروک آتا اولاد آتون مخاطب مننگ آ خوشی ءِ۔ وزیراعظم پارے کہ خیبرپختونخوا پاکستان نا زیبا انگا صوبہ ءِ ہرادے اللہ تعالیٰ زیباانگا مش، دریا و وسیلہ غاتے تسنے و داجاگہ نا الس خواری کش و نرزور ءُ۔ اگہ تدوک آ دور تیٹی علاقہ نا شونداری کن کاریم کننگاکہ تو دا زیبا انگا ڈیہہ و پاکستان اقوام عالم ات شون ہلوک شمار مسکہ ولے بیدس نواز شریف نا روشنا دور یا ایلو گونڈ آ دور تا من حیث القوم دابزرگ و شہید آتیکن ہچ اس کننگتو ہرافک پاکستان کن تینا جون ومال ءِ ندر کریر۔ اونا جاگہ غا، سفارش، تینائی گری و رشوت سکہ وخت انا رواج جوڑ مس۔ اینو ننا عظیم بزرگ و شہید آتا روحک قبرآتیٹی تڑپور انتئے کہ دا ہمو پاکستان اف ہراڑکن او تینا جون و مال ءِ ندر کریر۔ وزیراعظم پارے کہ ہنوک آ وخت انا ماتن کننگ نا جاگہ غا اوڑان سبخ ہلسا مون آ ہنوئی مریک۔ کنے یقین ءِ پاکستان بھاز زوت شون ہلوک ملک آتا صف اٹ اوار مریک ولے شڑت دادے کہ مچ آ سیاسی سرکڑدہ و غٹ ادارہ غاتا سروک آک اواری اٹ ملک انا تقدیر ءِ بدل کننگ نا عزم کیر تو اسہ گڑا س ہم ملک انا شونداری و شونہالی نا کسر اٹ اڑاند مننگ کپک۔ وزیراعظم پارے کہ اگہ نن خواری، امانت و دیانت ءِ تینا کین تو وام ہلنگ نا ضرورت تمپک بلکن پاکستان وام تروک آ ملک جوڑ مریک۔ اوپارے کہ اللہ تعالیٰ پاکستان ءِ قدرتی وسیلہ غاتیان شپ کرینے۔ ننا الس کسبکار، خواری کش، نرزور و جفاکش ءُ۔ وزیراعظم پارے کہ پول مفننگ نا سوب آن تورغر نا الس ءِ دونیم کلومیٹر نا ودکی سفر ءِ کروئی تمک۔ تدوک آ سال تیٹی دا پول بایدے جوڑ مروسس۔ اوپارت کرے کہ دن و نن کاریم کرسا مسہ سال انا جاگہ غا اسہ سال انا دا پول انا تفنگءِ پورو کننگے۔ اوپارے کہ کنا پنجاب اٹی کم آن کم مدت اٹی شونداری ڈٹ پورو کننگ نا ریکارڈ ءِ، انشاء اللہ دا پول ہم اسہ سال اٹی جوڑ مریک و اللہ موقع تس تو بروک آ لس گچین کاری تیان پد مسلم لیگ (ن) نا حکومت اٹی ہی داپول انا بنامریک۔ وزیراعظم انجینئر امیر مقام و کیپٹن (ر) محمد صفدر نا خواست آ علاقہ ٹی 2 کالج آتا جوڑ کننگ و کالاڈھاکہ ٹی بجلی نا فراوانی نا ڈٹ آتا منظوری نا ہم پڑو ءِ کرے۔ داکان مست وزیراعظم نا سلاہکار انجینئر امیر مقام و مسلم لیگ (ن) ناراہشون کیپٹن محمد صفدر ئسک ہم دود آن تران کریر۔

(اے پی پی)