توہین الیکشن کمیشن کیس، فواد چوہدری ناقابل دزگیری ضمانت وارنٹ جاری

اسلام آباد : توہین الیکشن کمیشن کیس اٹ پاکستان تحریک انصاف (پی ٹی آئی) نا مسکوہی راہشون و مسکوہی بنجائی وزیر فواد چوہدری نا ناقابل ضمانت دزگیری وارنٹ جاری کننگا‘حوال نا رد اٹ پنچ شنبے نا دے فواد چوہدری نا برخلاف توہین الیکشن کمیشن کیس انا سماعت مس‘ چیف الیکشن کمشنر ناکماشی ٹی پبنچ باسکی کمیشن کیس انا سماعت ءِ کرے‘ داوخت آ فواد چوہدری نا کمکار وکیل الیکشن کمیشن اٹ پیش مس‘سماعت نا وخت آ فواد چوہدری نا کمکار وکیل کیس ءِ پد بٹنگ نا درخواست کرے‘ الیکشن کمیشن نا باسک سوج کرے کہ فواد چوہدری بسنے؟ فواد چوہدری نئے تینٹ بسنے ونئے استثنی نا درخواست تسنے‘ فواد چوہدری نا کمکار وکیل دلیل ترسا پارے کہ ہائیکورٹ اٹ اینو الیکشن کمیشن نا وکیل ءِ دلیل تروئی ءِ‘کیس ءِ پد بٹنگے انتئے کہ ہائی کورٹ اسہ اِرا دے اٹ تینا فیصلہ ءِ بنفک۔داکان گڈ الیکشن کمیشن فواد چوہدری نا کمکار وکیل نا خواست ءِ مسترد کرسا فواد چوہدری نا برخلاف توہین الیکشن کمیشن نا سماعت ءِ 20 جولائی اسکان پد بٹے۔ ایلو کنڈ آ اسلام آباد ہائی کورٹ نا چیف جسٹس عامر فاروق نا عدالت مسکوہی بنجائی وزیر چوہدری فواد حسین نا الیکشن کمیشن نا شوکاز نوٹس نا برخلاف درخواست آ فیصلہ ءِ ڈک کرے۔ پنچ شنبے نادے آ سماعت اٹی چیف جسٹس پارے کہ اسہ ہی باندات آ ایف آئی آر مسنے، اسہ ڈوہ آ اسہ ہی سزا و و اسٹ مننگ کیک۔ چیف جسٹس عامر فاروق الیکشن کمیشن وکیل ءِ پارے کہ نی ولدا ہم دلیل تننگ خواسہ تو نا مرضی، اسہ ہی باندات آ ایف آئی آر مسنے تو توہین کمیشن آ کارروائی امر؟ درخواست گزار ناموقف ءِ کہ اسہ ڈوہ آ اِرا جتا مقدمہ چلیفنگ مفک۔ وکیل الیکشن کمیشن پارے کہ فوجداری مقدمہ بغاوت آ ہشکا تننگ نادفعہ غاتا رداٹ درج کننگانے، او جتا ءُ باندات اسے، الیکشن کمیشن توہین نا شوکاز نوٹس اس جاری کرینے، الیکشن کمیشن نا وکیل تینا دلیل آتا مخ تفی ٹی عدالتی فیصلہ غاتا حوالہ ءِ ہم تس۔ چیف جسٹس پارے کہ عدالتی فیصلہ تو ساڑی ءِ کہ سول و کرمنل ہڑتوم آک اوار چلینگ انگ کیرہ، توہین الیکشن کمیشن نا شوکاز نوٹس اٹی سزا مرے تو ایلو کیس آ انت اثرتمک؟ وکیل الیکشن کمیشن پارے کہ ایلو کیس آ ہچ ءُ اثراس تمپک۔ وکیل آتا دلیل آتا پورو مننگ آ عدالت فیصلہ ءِ ڈک کرے۔

(آن لائن)