بلوچستان نا 35 ضلع نا چیئرمین وڈپٹی چیئرمین نا گچین کاری تا عمل پورو

کوئٹہ : بلوچستان نا 35 ضلع نا ڈسٹرکٹ کونسل نا باسک آتا سوغند ہرفنگ و چیئرمین وڈپٹی چیئرمین نا گچین کاری تیکن پولنگ ناعمل پورو مس‘ بے چیٹی ناہچ ءُ واقعہ اس پیش بتو۔ صوبائی الیکشن کمشنر بلوچستان شریف اللہ پارینے کہ بلوچستان نا 35 ضلع نا ڈسٹرکٹ کونسل نا باسک آتا سوغند ہرفنگ و چیئرمین و وائس چیئرمین نا گچین کاری تیکن پولنگ ناعمل پورو مسنے‘ اللہ نا شکر ءِ ادا کیوہ کہ پولنگ ناوخت آ ہچ ءُ بے چیٹی نا واقعہ اس پیش بتو‘ صوبائی حکومت ڈسٹرکٹ ریٹرننگ افسر‘ ریٹرننگ افسر‘ کانود نافذ کروک ادارہ‘ الیکشن کمیشن نا کارندہ و میڈیا نا کمک کننگ آ اوفتا منت ءِ ہرفوہ کہ ہرافتا خواری آن بلوچستان اٹ لوکل گورنمنٹ نا پنچمیکو وگڈیکو مرحلہ گچینی اٹ پورو مس۔ وزیراعلیٰ بلوچستان میر عبدالقدوس بزنجو صوبہ نا 35 ضلع ٹی ڈسٹرکٹ کونسل نا چیئرمین و وائس چیئرمین نا گچین کاری عمل نا گڈیکو ریسہ نا پرامن و گچین وڑ اٹ اڈ تننگ آ است جمی نا درشانی ءِ کرسا پوسکن گچین مروکک ضلعی چیئرمین و وائس چیئرمین تے مبارکبادی تسنے‘ وخت اس کہ او انتظامیہ‘پولیس و لیویز ءِ گچین سکیورٹی و ایلو بست وبند آتیا خراج تحسین پیش کرینے‘ تینا کلہو اٹ وزیراعلیٰ پارے کہ واکداری تاشیفکو کہول آگدریفنگ اٹ فعال بلدیاتی ادارہ غاک بھازاہم ءُ و بلدیاتی گچین کاریک جمہوریت و جمہوری رویہ تا چرجوئی نا درشانی ءُ‘ بلدیاتی گچین کاری کرفنگ نا مسخت ہندی کہول آ الس ءِ واکدار جوڑ کننگ ءِ‘ اوپارے کہ نن صوبہ ٹی پرامن بلدیاتی گچین کاری اڈ تسن و نن بلدیاتی گچین کاری تے ٹی پولیس و لیویز ناکنڈآن فراوان کروک سکیورٹی نا کمک اٹ دانا شاہدی ءِ ہم تسن کہ صوبہ دا امن ناکنڈآ ہننگ اٹی ءِ۔ او پارے کہ بلدیاتی گچین کاری تاوخت آ ای تینا باوہ پیرہ ئی آ حلقہ تون اوار صوبہ نااسہ ضلع سے نا ہم دورہ ءِ کتوٹ تاکہ الس اٹ دا تاثر مف کہ تینا است خواہی ناوڑ نتیجہ دوئی کننگ کن سرکاری مشینری ءِ کاریم اٹ اتنگانے۔ وزیراعلیٰ پارے کہ بلدیاتی گچین کاری تا مسخت الس ناویل آتے اوفتا درگہ غا ایسر کننگ و ہندی کہول آ اوفتے زیات آن زیات آسراتی فراوان کننگ کرسا اوفتیکن انتظامی امور اٹ آسانی ودی کننگ ءِ و دا احساس ءِ تالان کننگ ءِ کہ واکداری نا اصل وت الس ءِ۔ وزیراعلیٰ اومیت درشان کرے کہ پوسکن گچین مروک ضلعی کونسل نا چیئرمین و وائس چیئرمینک تینا منصبی فرض ءِ گچین وڑ اٹ پورو کیرہ و الس نا خذمت ءِ الس نا آسودہی ءِ تینا شعار سرپند مریرہ و ضلعی وسیلہ غاتے الس نا فائدہ کن کاریم اٹ اتسا الس ناویل آتے ایسر کیرہ۔ وزیراعلیٰ پوسکن گچین مروک ضلعی چیئرمین و وائس چیئرمین تیکن نیک انگا استخواہی تا درشانی ءِ کرسا پرامن گچین کاری عمل اٹ سکیورٹی ادارہ غاتے مبارکبادی تسنے۔

(آن لائن)