اپوزیشن نا مون ءِ توننگ کن وزیر اعظم نا جلسہ جلوس و السی رابطہ مہم بنا کننگ نا پارت

اسلام آباد : وزیراعظم عمران خان ناکماشی ٹی سینٹرل ایگزیکٹو کمیٹی نا دیوان اٹ اپوزیشن نا برانزی تحریک و لانگ مارچ انا مون ءِ توننگ کن تحریک انصاف ہم مچ آ ملک اٹ جلسہ‘ جلوس و السی رابطہ مہم بنا کننگ نافیصلہ کرینے‘ حوالی نا رد اٹ وزیراعظم عمران خان ناکماشی ٹی تحریک انصاف نا سینٹرل ایگزیکٹو کمیٹی نا دیوان اٹ وزیراعلیٰ پنجاب عثمان بزدار تون اوار کمیٹی نا باسک آک بشخ ہلکر، بلدیاتی گچین کاری تا تیاری تے مون آتخسا السی رابطہ مہم بنا کننگ نافیصلہ کننگانے و وزیراعظم السی جلسہ غاتا شیڈول ءِ ہم تیار کننگ نا پارت کرینے‘ دیوان اٹ بلدیاتی گچین کاری تا تیاری تا جاچ ءِ ہم ہلنگا و حوالی نا رد اٹ بلدیاتی گچین کاری تے ٹی ٹکٹ تننگ نا وڑ وڈول آ ہم سلابت کننگانے‘ وزیراعظم پارے کہ ٹکٹ پارٹی تون مخلص و آزموندہ کار بندغ آتے تننگک‘ تینائی گری کننگپک‘ بھلا شار تے ٹی میئر کن پن تا سلاہ غا ہم سجفنگا، وزیراعظم پارے کہ بلدیاتی گچین کاری تیکن پارٹی نا تنظیمی پنچر ءِ منظم کننگے‘ ننا کارندہ غاک پارٹی نا نہادی میرات ءُ و بلدیاتی گچین کاری تے ٹی ٹکٹ میرٹ آ تننگک‘ او پارے کہ تحریک انصاف ملک انا پنی آ جماعت ءِ و نن پورو واکداری اٹ بلدیاتی گچین کاری تے ٹی پڑ آ بریک‘ الس تون پی ٹی آئی آن بیدس پین گچین ءُ آپشن اف‘ اپوزیشن نا لانگ مارچ یا کبینی مارچ آن فریشان مفبو دا مہالو ہم بے سہب مس و داسہ ہم بے سہب مریک انتئے کہ الس اوفتے مسترد کرینے‘ دیوان اٹ وزیراعظم نا چین نا دورہ نابابت ہم بریفنگ تننگا،کمیٹی سرسہب دورہ غا وزیراعظم ءِ مبارکباد تس وخت اس کہ وزیراعظم میڈیا ٹیم ءِ پارت کرے کہ چین نادورہ نا سرسہبی ءِ مونی اتنگے۔