نوشکے ٹی اِرا پوسکن ءُ تحصیل، اسہ سب تحصیل اس جوڑ کننگ نا پڑو

نوشکے: وزیراعلیٰ بلوچستان میر عبدالقدوس بزنجو ضلع نوشکے ٹی اِرا پوسکن ءُ تحصیل و اسہ سب تحصیل اس جوڑ کننگ نا پڑو کرینے‘ وزیراعلیٰ زوت آتیٹ دہشتگردی آن زہمی ٹیچنگ ہسپتال نوشکے نا دمدستی بحالی کن چیف سیکرٹری ءِ پارت کرینے وخت اس کہ او پارے کہ نوشکے کہ 50 بسترہ غا تالان ہسپتال ءِ زوت پورو کننگک ہرانا بناءِ کن ای تینٹ نوشکے آ بریوہ۔ دا خیال آتا درشانی ءِ او یک شنبے نا دے نوشکے آن تعلقدار قبائلی راہشون میر اورنگزیب بادینی نا ہنکین آ اونا بلوچستان عوامی پارٹی ٹی اوار مننگ نا دود آن تران کرسا کرے۔ دود اٹ چیئرمین سینیٹ محمد صادق سنجرانی، صوبائی وزیر پارٹی راہشون پرنس قادر بلوچ و سَد آ کارندہ غاک ہم ساڑی ئسر۔ وزیراعلیٰ ءِ دا وخت آ روایتی دستار ہم بیرفنگا۔ وزیراعلیٰ بلوچستان میر عبدالقدوس بزنجو میر اورنگزیب بادینی نا بلوچستان عوامی پارٹی ٹی اوار مننگ نا ستاءِ کرے و اودے مبارکبادی ترسا پارے کہ میر اورنگزیب بادینی نا اوار مننگ آن پارٹی پین سوگو مریک انتئے کہ او تینا گچین کاری حلقہ  نااسہ سوگو ءُ اومیتدار اسے اونا بھلو وونٹ بینک اسے۔ وزیراعلیٰ پارے کہ بھلو وخت اسے آن رخشاں ڈویژن جوڑ کننگ نا گرج محسوس کننگاکہ و دا بلوچستان عوامی پارٹی نا کوشست اٹ مننگ کرے کہ ہراتم 2018 اٹ نن حکومت ءِ بدل کرین تو کل آن مست رخشاں ڈویژن جوڑ کننگ نافیصلہ کرین دا اسہ بھلو فیصلہ اس ئس ہرانا مسخت دا جاگہ نا بندغ آتے آسراتی فراوان کننگ ئس تاکہ اوفتا ویل آک ڈویژن نا کہول آ ایسر مننگ کیر۔وزیراعلیٰ پارے کہ صوبائی حکومت ضلع نوشکے ٹی کل اہم و السی نوعیت نا ڈٹ آتے زوت پورو کننگک‘ دود آن مسکوہی صوبائی وزیر میر عبدالکریم نوشیروانی ومسکوہی کوآرڈینیٹر وزیراعلیٰ اعجاز سنجرانی ہم تران کرے وخت اس کہ میر اورنگزیب بادینی تینا تران اٹ وزیراعلیٰ ناکماشی آ پورو پت انا درشانی ءِ کرسا پارے کہ او بلوچستان عوامی پارٹی نا الس دوست پالیسی تون امنائی کرسا تینا سَد آسنگت آتتون اوار پارٹی ٹی اوار مننگ نا پڑو کیوہ۔