مولانا نواز شریف و زرداری تون ٹیلفون آ جتا جتا حالی حوالی

0

Get real time updates directly on you device, subscribe now.

اسلام آباد : پاکستان ڈیموکریٹک موومنٹ نا سروک مولانا فضل الرحمن مسکوہی وزیراعظم نواز شریف ومسکوہی صدر آصف علی زرداری تون جتا جتا ٹیل فون آ رابطہ کرینے ہراٹی فیصلہ کروک حکومت مخالف تحریک کن چندی آپشن تیا ہیت وگپ کننگانے، پی ڈی ایم نا حوالی نا رد اٹ ن لیگ نا سینٹرل ایگزیکٹو کمیٹی نا دیوان آن مست نواز شریف و فضل الرحمن نا نیام اٹ ٹیل فون آرابطہ مسنے ہڑتوم آ راہشونک حکومت مخالف تحریک ءِ فیصلہ کروک کننگ کن سلابت کریر وخت اس کہ نواز شریف پی ڈی ایم نا سروکی دیوان ءِ ہم زوت بٹنگ انگ نا خواست کرے ہراڑا مولانا فضل الرحمن بروک آ ہفتہ پی ڈی ایم نا دیوان ءِ بٹنگ انگ نا پارینے‘ ہڑتوم آ راہشون تا نیام اٹ اپوزیشن نا اسیجائی لانگ مارچ انا بارو اٹ پیپلز پارٹی ناسلاہ تے ہم ہیت وگپ کننگا، نواز شریف پارے کہ ن لیگ تنیا گام ہرفنگ نا جاگہ غا پی ڈی ایم نا پلیٹ فارم آن کروک فیصلہ غاتا پابند ءِ دا حکومت آن نجات المی جوڑ مسنے‘ و اخیر اودے اُراغا راہی کرسا پوسکن گچین کاری کرفنگے‘ اپوزیشن سیوت کرسا دا حکومت ءِ چٹفنگ کیک‘ مولانا فضل الرحمن پارے کہ دا حکومت ءِ چٹفنگ کن کل آئینی‘ کانودی و السی آپشن تے کاریم اٹ اتنگک‘ دا وخت آ ملک اٹ کبینی آسمان ءِ سر مسنے و الس بھاز فریشان ءِ‘ الس ءِ دا عذاب آن بچفنگ کن حکومت نابرخلاف ہر وڑ ءِ کاریم اٹ اتنگک۔ حوالی نا رد اٹ آصف زرداری و فضل الرحمن نا نیام اٹ ٹیل فون آ رابطہ ٹی ہم چیئرمین سینیٹ صادق سنجرانی، اسپیکر قومی اسمبلی اسد قیصر، وزیراعلیٰ پنجاب عثمان بزدار و وزیراعظم عمران خان نا برخلاف بے پتی ناتحریک کن ہیت وگپ مس و دا بابت پارلیمنٹ اٹ اپوزیشن جماعت آک اسیجائی حکمت عملی تینائی کیرہ،آصف زرداری ن لیگ نا سرکڑدہ غاتتون تینا اوڑدہی تا بارو اٹ ہم فضل الرحمن ءِ پت اٹ ہلک و پارے کہ بے پتی ناتحریک آئینی و کانودی ءُ کسر اسے و اسٹیبلشمنٹ ہم داوخت آ نیوٹرل خننگک ہندا سوب آن بے پتی نا کمک اٹ دا حکومت ءِ چٹفوئی مریک۔

Get real time updates directly on you device, subscribe now.

Leave A Reply

Your email address will not be published.