بنو قابل پروگرام نا گوادر نا ورناتے ڈیجیٹل کسب ہیل تننگ کن ءِ،مولانا ہدایت الرحمان

کوئٹہ، بلوچستان اسمبلی نا باسک مولانا ہدایت الرحمان پارینے کہ الخدمت بنو قابل پروگرام نا مسخت گوادر تون اوار بلوچستان نا ورناتے پوسکن فنی و ڈیجیٹل چاہنداری تیان شُپ کرسا اوفتے کن شونداری، روزگار و خودکفالت نا پوسکن آ وارخواہی ودی کننگے۔ داہیت ءِ او گوادر اٹی الخدمت بنوقابل پروگرام گوادر سینٹر نا دورہ نا وخت آ ہیلکاری دوئی کروک مسڑ طالب علم آتتون اوڑدہی کرے و اوفتا است بڈی ءِ کرسا داہیت آ زور شاغا کہ ورناک خاص وڑ اٹ مسڑ طالب علم آک تعلیم تون پوسکن آٹیکنالوجی و فنی چاہنداری نا دوئی کننگ آ خاص چکار کیر تانکہ او آخبت اٹ عزتی ءُ روزگار و تینے ولفنگ نا وارخواہی دوئی کننگ کیر۔ داوخت آ الخدمت بنو قابل پروگرام نا کیمپس ایڈمن حماد رحیم طالب علم آتا کنڈآن اسہ اہم سلاہ اس پیش کرسا بلوچستان اسمبلی نا باسک انا چکار ءِ بنو قابل گوادر نا نمان کارکڑد نشان تروک آ فارغ التحصیل مارومسر طالب علم آتے لیپ ٹاپ فراوان کننگ آ کنڈآ کرفے۔ اوسلاہ تس کہ ہراوڑ امیر جماعت اسلامی پاکستان حافظ نعیم الرحمان نا کاٹم خواجہی ٹی مچ آملک انا پوزیشن ہولڈر فارغ التحصیل مارومسڑ طالب علم آتے ٹی میرٹ نا بنداو آ لیپ ٹاپ بشخ وپانٹ کننگا ہندا وڑ گوادر نا لائخ آ و نمان کارکڑد نشان تروک آ ورناتیکن ہم میرٹ آتالان لیپ ٹاپ اسکیم درستی راستی کرفنگے، تانکہ او تینا دوئی کروک ڈیجیٹل چاہنداری تے عملی پڑ اٹ کاریم اٹ اتنگ کیر۔ بلوچستان اسمبلی نا باسک مولانا ہدایت الرحمان پارے کہ مارومسڑ طالب علم آتے ٹی میرٹ نا بنداو آ لیپ ٹاپ بشخنگ نا سلاہ ورناتا است بڈی، ڈیجیٹل اواری و اوفتے زرگزرانی وڑاٹ وتواجہ جوڑ کننگ نا کنڈآ اسہ اہم گام اس جوڑ مننگ کیک و دابابت ای تینا کڑد ءِ ادا کیوہ ہراکہ گوادر نا ورناتا واکداری و ڈیجیٹل شونداری نا کنڈآاہم پیشرفت اس مریک۔