سرکاری بُنگ آتا دوئی کننگ نا کاریم ءِ پین بھرمی و سوگو کننگے،سیدرحمت اللہ شاہ

جھل مگسی، ڈپٹی کمشنر جھل مگسی سید رحمت اللہ شاہ نا کماشی ٹی ضلعی ریونیو باندات و سرکاری بنگ انا دوئی کننگ تون تعلقدار ریونیو افسر آتا اسہ اہم ءُ دیوان اس اڈ ہلک۔ دیوان اٹی تحصیلدار جھل مگسی ارباب خان مگسی، تحصیلدار گنداواہ اقبال سولنگی، نائب تحصیلدار میرپور سلیمان خان جویہ اوار تعلقدار پٹواری و ایلو ریونیو کارندہ غاک بشخ ہلکر۔ دیوان نا وخت آ مچ آ ضلع ٹی ریونیو تون تعلقدار برجا باندات‘ سرکاری بنگ ہلنگ‘ گردآوری نا عمل و جتاجتا ریونیو رپورٹ آتا تیاری و پیشرفت نا جم جاچ ءِ ہلنگا۔ ڈپٹی کمشنر سید رحمت اللہ شاہ تعلقدار افسر آتے پارت کرے کہ ریونیو میٹنگ آتے باقاعدگی اٹ اڈ تننگ ءِ پک کننگے تاکہ مون تروک ویل آتا وخت آ نشاندہی و اوفتا ایسری کن جوان گام گیج کننگ مرے۔ او پارت کرے کہ اے آئی ٹی (AIT) انکم ٹیکس و کشت وکشار تون تعلقدار رپورٹءِ پورو معلومداری و راست گوشوارہ غاتا بنداو آ جوڑ کرسا پک وخت آ پیش کننگے۔ دا رد اٹ ہچ وڑ انا ڈیوالئی یا رے تے آن پاناد کننگے و کل تعلقدار ریکارڈ ءِ ہم باقاعدگی اٹ اپ ڈیٹ تخنگے۔ ڈپٹی کمشنر مستی پارے کہ سرکاری بنگ ہلنگ و گردآوری نا عمل ءِ پین گچین و منظم جوڑ کننگے، وخت اس کہ پک کروک ہدف آتا دوئی کننگ کن کل ریونیو افسر وکارندہ غاک تینا کسبی زمواری تے پورو ایمانداری، خواری اٹ سرایتر۔ او دا ہیت آ ہم زور شاغا کہ ریونیو باندات آتے ٹی شفافیت، نظم و ضبط و السی آسراتی ءِ اولیت تننگے و سرکاری زرتس آتا ہلنگ نا عمل اٹی ریسہ ءِ برجا تخنگے۔ گڈسر اٹ ڈپٹی کمشنر تعلقدار افسر آتے پارت کرے کہ دیوان اٹی تننگوک پارت آتیا عملدرآمد ءِ پک کرسا کارکڑد و پیشرفت تون تعلقدار رپورٹ آتے باقاعدگی اٹ ضلعی انتظامیہ ءِ پیش کننگے۔