بلوچستان اٹی سول و ملٹری بیلنس ءِ برجا تخنگ وخت انا اہم ءُ گرج اسے،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان اٹی سول و ملٹری بیلنس برجا تخنگ وخت انا اہم ءُ گرج اسے، دہشت گردی نا برخلاف جنگ اٹی سیکورٹی فورس آتے کارروائی کن گچین چاگڑد فراوان کروئی تمک۔ ریاست ہچ ءُ حالیت اسے ٹی تینا شاری، سیکورٹی کارندہ و کانود نافذ کروک ادارہ غاتے دہشت گرد تا دوتیا النگ کپک۔ دا خیال آتا درشانی ءِ او تدوک آ دے بلوچستان اسمبلی نا دیوان اٹی قائدِ حزبِ اختلاف میر یونس عزیز زہری نا کنڈ آن پوائنٹ آف آرڈر آ ہرفوک باندات آ تینا خیال آتا درشانی ءِ کرسا کرے۔ وزیراعلیٰ بلوچستان پارے کہ دا وخت آ ای مستین پیش بروک دہشت گردی نا واقعہ نا ذکر ءِ کننگ خواوہ ہرانا ذکر ءِ اسمبلی نا باسک نور محمد دمڑ کرے۔ دہشت گرد آک ہرا وڑ اٹ سیکورٹی فورس آتیا جلہو کریر و بیدردی اٹ ننا بندغ آتے شہید کریر، اونا مذمت کن لوز بھاز کم ءُ۔ شہید آتا درجہ بھاز بڑزاءِ و ننا ایمان ءِ کہ شہید آک رسول اللہ ﷺ نا شفاعت اٹی مریرہ و دا دنیا غان بھاز گچین ہند اٹ مریرہ۔ میر سرفراز بگٹی پارے کہ او اولیکو دے آن بلوچستان اسمبلی نا نمائندہ و شرفمند ایوان نا مون آ دا ہیت ءِ تخنگ نا کوشست کننگ اٹی ءِ کہ دہشت گردی ءِ سرپند مننگ کن دا راستی ءِ پہہ مروئی تمک کہ سیکورٹی فورس آک دا وخت آ اسہ ‘گرے زون’ اٹی کاریم کننگ اٹی ءُ۔ او پارے کہ قائدِ حزبِ اختلاف نا کنڈ آن اونا مسکوہی بیان ءِ سیاق و سباق آن چپ پیش کننگانے، و سیاسی اسکورنگ منہ بندغ کن شغل اس جوڑ مسنے۔ او پارے کہ بھاز آ بندغ آک کنے آئی ایس پی آر نا نمائندہ گوندار ولے راستی دا اے کہ ریاستِ پاکستان و دا شرفمند ایوان اودے دا زمواری تسنے کہ او ریاست نا بیانیہ، حکومت نا بیانیہ و دہشت گردی و شونداری نا بابت حکومت نا موقف ءِ اسمبلی نا مون آ اتے۔ وزیراعلیٰ پارے کہ بلوچستان ہچ ءُ حالیت اسے ٹی سول و ملٹری نا نیام اٹی بے بریبری ناباریم ءِ سگنگ کپک۔ بلکہ ساڑی حالیت اٹی سول و ملٹری بیلنس نا بھاز گرج ءِ۔ دا فریشانی نا ہیت اسے کہ کساس ہر اسمبلی دیوان نا بنا دعا پاتیہ غان مریک۔ دا گمان آن چَپ ءُ حالیت اس اف۔ ہڑدے بندغ آک شہید مننگ اٹی ءُ، سیکورٹی کارندہ غاتے بیدردی اٹ سہید کننگ انگ ءِ و شہید آتا لاش تے خاخر تننگ انگ ءِ‘ او پارے کہ تدوک آ دے شہید مروک اسہ کیپٹن اسے نا بیرہ 6 تُو انا مسڑ اسے‘ اندازہ خلنگ مریک کہ اونا خاہوت آ انت گدرینگ انگ ءِ۔ ہندا وڑ دالبندین اٹی شہید مروک ایلو کیپٹن و اونا خاہوت نا ڈکھ و ارمان ہم بیان مننگ کپک۔ دا جنگ اٹی کیہی کرنل، جرنل، سیکورٹی کارندہ، پولیس کارندہ و لس شاریک شہید مسنو۔ میر سرفراز بگٹی پارے کہ اودے تدوک آ دے بسیمہ غان اسہ چناس فون کرے ہرا کنے پارے کہ بی ایل اے نا بندغ آک اونا ایلم ءِ درینو، اونا جند پارے کہ او بے گناہ ءِ و ہچ کتنے۔