یوم دفاع ننے آجوئی، وتواجہی و قومی سلامتی نا رکھ اکن تننگوک قربانی تا یات ترفک،صدر مملکت/ وزیر اعظم

اسلام آباد، صدر آصف علی زرداری پارینے کہ 6 ستمبر ننا قومی تاریخ اٹی اسہ یاتگار ءُ دے اسے۔ دا دے ننے ہمو بھلا قربانی تا یات ءِ ترفک ہرا ننا آجوئی، وتواجہی و قومی سلامتی نا رکھ اکن تننگانو۔ ننا شہید آک تینا دتر و قربانی تا کمک اٹ قومی تاریخ اٹی بہادری و حب الوطنی نا ہندن ءُ گیرام مفروک داستان پک کرینو ہرا مدامی کن بروک آ چین تیکن کسر نا ڈیوا جوڑ ءُ۔ اسہ زموار ریاست اسے نا حیثیت اٹ پاکستان ڈیہہ و مچ آ دنیا ٹی امن، ہیت وگپ و تین پہ تینی شرف انا شون تننگ کن پورو وڑ اٹ سنبرینگوک ءِ۔ یومِ دفاع و شہداء نا وخت آ تینا کلہو اٹی صدر آصف علی زرداری پارے کہ 6 ستمبر ننا قومی تاریخ نا اسہ روشناءُ باب اسے۔ دا دے ننے ہمو قربانی تا یات ترفک ہرا قومی آجوئی‘ وتواجہی و ایلو باندات آتیکن تننگاسر۔ صدر پارے کہ یومِ دفاع و شہداء پاکستان ننے دا وارخواہی فراوان کیک کہ نن راج انا بہادر آ وقربانی تروک آتے خراجِ عقیدت پیش کین، ہرافک 1965 اٹی وطن نا رکھ اٹی بے مٹ عزم، بہادری و زمواری نشان ترسا دشمن نا پراگندہ ارادہ غاتے ہر پڑ آ بے سہب کریر۔ ای مچ آ قوم انا کنڈ آن پاکستان نا سلہہ بند فوج انا شہید‘ غازی و اوفتا پدخاہوت ءِ سلام پیش کیوہ۔ ننا شہید آک تینا دتر و جان تے ندر کرسا شجاعت نا ہندن ءُ بے مٹ داستان نوشتہ کریر ہرا بروک آ نسل تا راہشونی کن کسر ڈیوا جوڑ مسر۔ صدر پارے کہ 6 ستمبر 1965 آ سلہہ بند فوج و پاکستانی قوم ہرا سیوت و یکجتہی نا درشانیءِ کرے، او ننا جم واکداری نا درشانی ءِ۔ دا دے ننے یات ترفک کہ ہراتم اسہ قوم اس تینا آجوئی و وطن نا رکھ اکن اسٹ مرے تو دنیا نا ہچ ءُ واک اس اونا ارادہ ءِ نزور کننگ کپک۔دا رد اٹ وزیراعظم محمد شہباز شریف پارینے کہ تاریخ شاہد ءِ کہ 1965 نا جنگ اٹی ننا سلہہ بند فوج بے کچ کسبی چاہنداری و شجاعت نا درشانی ءِ کرے۔ سلہہ بند فوج و قوم اسیجا مرسا ننا قومی تاریخ اٹی گمرکروک و بے مٹ قربانی تسر۔معرکہ حق اٹی پاک فوج کسبی سج پام اٹ تینا ازلی دشمن ءِ ہندن ءُ ترند ءُ ورندی اس تس کہ نسل آک تے مدام یات تخرہ تے۔ مچ آ قوم تینا بہادر پاک فوج، پاک فضائیہ و پاکستان نیوی آ گمر کیک۔ یومِ دفاع و شہداء 6 ستمبر 2026ء نا وخت آ تینا کلہو اٹی وزیراعظم شہباز شریف پارے کہ 6 ستمبر ننا قومی تاریخ نا اسہ گچین ءُ باب اسے، ہرا ننے وطنِ عزیز نا رکھ اکن سلہہ بند فوج و قوم انا بے مٹ عزم، سیوت و قربانی تا یات ترفک۔ دا دے ننے ہمو شہید و غازی تے خراجِ عقیدت پیش کننگ نا وارخواہی فراوان کیک ہرافک پاکستان نا سلامتی، وتواجہی و آجوئی نا رکھ اکن تینا جان تے ندر کریر۔ 6 ستمبر 1965 آ دشمن نا خارتس بیدادی و کچ اٹ زیات مننگ آن پد ہم پاکستان نا سلہہ بند فوج تینا کسبی چاہنداری و آپریشنل تیاری تا کمک اٹ اودے ہر پڑ آ شکست تس۔ وزیراعظم پارے کہ یومِ دفاع نا وخت آ ای مچ آ قوم انا کنڈ آن سلہہ بند فوج انا شہید‘ غازی و اوفتا پدخاہوت ءِ خراجِ عقیدت پیش کیوہ۔