بلوچستان اٹی امن، شونہالی و شونداری ریاستی کوشست آتا وت ءِ،فیلڈ مارشل عاصم منیر

راولپنڈی، آرمی چیف و چیف آف ڈیفنس فورسز فیلڈ مارشل سید عاصم منیر کوئٹہ گیریژن نا دورہ کرے و فیلڈ فارمیشنز نا کمانڈرز و کمانڈنگ آفیسرز تون اوڑدہی کرے۔ دورہ نا وخت آ فیلڈ مارشل ءِ ساڑی سیکورٹی حالیت، آپریشنل تیاری و بلوچستان اٹی امن و سوگوی ءِ برجا تخنگ کن برجا گام گیج آتیا جم بریفنگ تننگا۔ پاک فوج انا شعبہ تعلقاتِ عامہ (آئی ایس پی آر) نا رِداٹ دا وخت آ ادارہ ئی ہم آہنگی و صوبہ نا راجی و زرگزرانی شونداری ٹی کمک تون تعلقدار باندات آتا ہم جاچ ہلنگا۔ آرمی چیف و چیف آف ڈیفنس فورسز فیلڈ مارشل سید عاصم منیر ورناتا کسبی چاہنداری‘ آپریشنل تیاری، عزم و بڑزکو آب انا درشانی نا ستاءِ کرے۔ او سوگو امن و مدامگی اقتصادی سرجز و شونداری کن گچین چاگڑد ءِ برجا تخنگ کن کانود نافذ کروک ادارہ و ایلو ریاستی محکمہ غاتا نیام اٹ پدریسہ ہم گرنچی نا المی مننگ آ زور شاغا۔ فیلڈ مارشل دا عزم انا دوارگی ءِ کرے کہ بلوچستان نا الس نا امن، شونہالی و آسودہی ریاست نا کوشست آتا بنجائی وت ءِ۔ او پارے کہ اسہ سوگو و رکھوک آ چاگڑد صوبہ نا الس کن شونداری گام گیج، زرگزرانی وارخواہی و گچین گمان تا کسر ءِ پین آوار کیک۔ آرمی چیف و چیف آف ڈیفنس فورسز فیلڈ مارشل سید عاصم منیر شہید آتا قربانی تے گچین لوز آتے ٹی خراجِ عقیدت پیش کرے و زمواری نا پورو کننگ اٹ افسر و ورناتا نزور مفروک عزم و استخواہی تا ستاءِ کرے۔ داکان مست کوئٹہ آ سر مننگ آ کمانڈر کوئٹہ کور فیلڈ مارشل ءِ بخیر کرے۔