سانگ بند آتا نیام اٹ جنگ،ڈیرہ بگٹی ٹی سلہہ بند آتا تین پہ تین آ سم کاری، 4 بندغ زوال

ضلع ڈیرہ بگٹی نا کیبی علاقہ درینجن اٹی پیروزانی بگٹی قبیلہ نا کوہلی شاخ آن تعلقدار سانگ بند آتا نیام اٹی متکن آ جھیڑہ و دیر انا ویل آ مروک آ سلہہ بند جنگ اٹی چار بندغ زوال وخت اس کہ اسہ بندغ اس ٹھپی مس۔ حوال نا رِد اٹ فریق آتا نیام اٹی رشتہ نا اسہ متکن ءُ جھیڑہ اس ساڑی ئس، ولے تدوک آ دے ہمو وخت آ چک وتاڑ پین ودا ہراتم اسہ فریق اس ٹوبہ نا اسہ چشمہ اسے آن ربڑ نا پائپ اس چکسا دیر ءِ میدانی علاقہ اسکان سر کننگ نا بست و بند کرے۔ دا وخت آ ایلو فریق اوفتے ہندا جاگہ غان دیر ہلنگ آن توننگ نا پارے ہراڑان جھیڑہ ترند مس۔ حوال نا رد اٹ ایلو دے آ سہب اتون ہراتم اسہ فریق دیر پُر کننگ کن پائپ و تلاپ نا ہند آ سر مس تو اِرا گروپ آتا نیام اٹی ولدا جنگ بنا کرے ہرا کرار کرار آ سلہہ بند جنگ اٹی بدل مس۔ ہڑتوم آ کنڈآن سم کاری نا سوب آن چار بندغ زوال مسر و اسہ بندغ اس ٹھپی مس۔ زوال مروک آتے ٹی مراد ولد سوالی، ادو ولد مراد، روکا ولد سجا و سائیڈو ولد روکا اوار ءُ‘۔ حوال نا رِد اٹ زوال مروک آتیٹی اسہ کنڈ آن باوہ و مار وخت اس کہ ایلو کنڈ آ اِرا ایلم اوار ءُ۔ واقعہ غان پد علاقہ ٹی خلیس تالان مس وخت اس کہ ٹھپی بندغ ءِ طبی کمک کن خڑک انا ہسپتال آ گدریفنگا۔ حوال رسینگ تون لیویز فورس و ہندی انتظامیہ جاگہ غا سر مس و واقعہ نا جاست پاست نا بناءِ کننگا۔ حوال نا رِد اٹ زوال و ٹھپی مروک آتا تعلقداری پیروزانی قبیلہ نا کوہلی شاخ آن ءِ وخت اس کہ واقعہ نا سوب و ایلو سوب آتا مستی جاست پاست کننگ انگ ءِ۔