میڈیا تون تعلقدار کل بشخ آتا ویل آتے ایسر کینہ، سینیٹر شبلی فراز

اسلام آباد( تلار حوالکار) بنجائی حوالکاری وزیر شبلی فراز پارینے کہ میڈیا تون تعلقدار کل بشخ آتا ویل آتے ایسر کینہ، دا ہیت آتے او صحافی تنظیم آتا عہدیدار آتتون ویڈیو کانفرنس آ ہیت و گپ کرسا کرے۔ بنجائی وزیر اِرا گھنٹہ اسکان ویڈیو کانفرنس اٹ بھاز صبر و جیرت اٹ میڈیا نا ویل و اوفتا ایسری کن سلاہ سوج کرے۔ دا وخت آ اے پی آر این ایس نا صدر غلام مرتضیٰ جٹ اودے لوکل/ریجنل اخبار تے مون تروک ویل آتیان معلومدار کرے، و تینا سلاہ سوج آتے پیش کرے و ریجنل کوٹہ ءِ دمدستی بحال کننگ نا خواست کرے۔ سرجم حوال آتا رد اٹ آل پاکستان ریجنل نیوز پیپرز سوسائٹی نا صدر غلام مرتضیٰ جٹ پارے کہ نن شفافیت نا پالیسی نا ستا ءِ کینہ۔ و گچینی نا اومیت تخنہ۔ او پارے کہ ریجنل اخبار آتے اینو اسکان 10 درسَد کوٹہ غان زیات اشتہار تننگتنے، و ہرا رسینگانے، اوفتا ایڈورٹائزنگ ایجنسی تیان پیسہ غاک رسینگتنو۔ وخت اس کہ 25 درسَد کوٹہ ریجنل اخبار تا کانودی حق ءِ، دا حق ءِ سیاسی مسخت آتا دوئی کننگ کن ایلو اخبار تے تننگ انگ ءِ۔ و داسہ کانودی آن چَپ اٹ دادے ہم بند کننگانے۔ دانا بایدے پرسجو ءِ کننگے۔ ریگولر شینک مروک آ ریجنل اخبار تے سپورٹ کننگے، ریجنل اخبار آک بھاز جاگہ غاتیا تینا علاقہ و بھاز جاگہ غاتیا تینا زبان تا توار جوڑ ءُ۔ بنجائی وزیر ءِ سلاہ تننگا کہ غٹ صحافتی تنظیم آتا سلاہ سوج اٹ میڈیا نا کانودی ضابطہ اخلاق اس جوڑ کننگے۔ سینیٹر شبلی فراز باور کرفے کہ او ریجنل اخبار آتا خاص وڑ اٹ خیالداری ءِ کیک، و دا ویل آتا بُن اسکان ہنسا دافتے ایسر کیک۔ او پارے کہ حکومت پریس تون تینا تعلقداری تے بھاز اہمیت ایتک، داڑان حوال آتسکان رسینگ گیگ نا السی حق انا پوروی پک مننگ کیک۔ او پارے کہ حکومت میڈیا تون تعلقدار کل بشخ آتا ویل آتے ایسر کیک۔