این سی او سی نا دیوان، چنکا دکان، ٹرانسپورٹ، ڈومیسٹک جہاز آتے ملنگ نا سلاہ

اسلام آباد (مانیٹرنگ ڈیسک) نیشنل کمانڈ اینڈ آپریشن سینٹر (این سی او سی) نا دیوان اٹی مچ آ ملک اٹ پوریا جا تے سہب انا 9 بجہ غان بیگہ نا 5 بجہ اسکان، و ننکان 8 آن 10 بجہ اسکان ملنگ نا سلاہ منظور کننگانے۔ سلاہ سوج آتا منظوری آن پد مچ آ ملک اٹ پوریا جا تے 10مئی آن ملنگ نا گمان ءِ۔ دیوان اٹی پنجاب، سندھ و بلوچستان ٹرین و بس سروس آتے ملنگ نا مخالفت ءِ کریر۔ ٹرین سروس نا بحالی نا پک فیصلہ ءِ وزیراعظم نا کماشی ٹی قومی رابطہ کمیٹی نا دیوان اٹ مریک۔ بنجائی وزیر ڈٹ بندی و شونداری اسد عمر نا کماشی ٹی نیشنل کمانڈ اینڈ کنٹرول سینٹر نا دیوان اٹی لاک ڈاﺅن اٹی کمتی و آخبت نا حکمت عملی خاص وڑ اٹ 9 مئی آن پد لاک ڈائون ءِ چٹفنگ یا اوٹی ودکی نا بابت ہیت و گپ کننگا۔ این سی او سی نا دیوان اٹی پیش کننگوک سلاہ سوج آتے مون آ تخسا لاک ڈاﺅن اٹی کمتی، بین الصوبائی ٹرانسپورٹ ءِ ملنگ، پوریا جا تے بیگہ نا 5 آن پد8 بجہ اسکان بند کننگ و ننکان 8 آن 10 اسکان دوارہ ملنگ نا سلاہ ءِ منظور کننگا۔ حوال آتا رد اٹ پنجاب، سندھ و بلوچستان ٹرین و بس سروس ءِ بحال کننگ نا مخالفت ءِ کریر۔ ٹرین سروس نا بحالی نا پک فیصلہ وزیراعظم نا کماشی ٹی قومی رابطہ کمیٹی نا دیوان اٹی مریک۔ این سی او سی نا کنڈ آن چنکو کچ اسے ٹی 10 ٹرین آپریشن بنا کننگ نا سلاہ مون آ بسنے، وخت اس کہ وزیر ریلوے شیخ رشید 15 ٹرین چلیفنگ نا سلاہ ءِ مون آ ایسوسس۔ داکان بیدس تعمیراتی صنعت نا آسراتی تیٹی ودکی و اسلام آباد نا ہسپتال آتیٹی منہ او پی ڈی اسے فعال کننگ نا فیصلہ کننگا۔ اسلام آباد انتظامیہ ءِ کورونا وائرس نا بابت راجی سرجز آتیٹی رورل سپورٹ پروگرام اٹی منشاکار آتے اوار کننگ و وزیر اعظم ٹاسک فورس نا کمک اٹ غٹ یونین کونسل آتسکان رسینگ گیگ ءِ پک کننگ نا پارت کننگا۔این سی او سی ٹی دا سلاہ ہم مون آ بسنے کہ اسکول ، شادی ہال ، ہوٹل و بھلا شاپنگ مال آتے ملنگپ، و ریلوے سروس ہم داسکان بحال کننگپ۔ دیوان اٹی سلاہ مون آ بس کہ ہندی کہول آ ٹرانسپورٹ ءِ ملنگے، اڈہ مالک و ٹرانسپورٹر آک کورونا غان بچنگ کن ایس او پی تیا عمل ءِ پک کیر۔داکان بیدس چنکا دکان و عئید انا ہل/ تس انا بابت دکان تے ملنگ نا موکل تننگے۔