مسلم لیگ ن نا کنڈ آن 18 می ترمیم اٹی بدلی نا مخالفت ءِ کننگ نا فیصلہ

0

Get real time updates directly on you device, subscribe now.

لاہور (مانیٹرنگ ڈیسک/آن لائن) لاہور اٹی شہباز شریف نا کماشی ٹی پاکستان مسلم لیگ (ن) نا دیوان مس، ہراٹی 18می آئینی ترمیم تون اوار نیب ترمیمی آرڈیننس آ سجفنگا، حوال آتا رد اٹ ن لیگ 18می ترمیم اٹی ہر وڑ انا بدلی نا مخالفت ءِ کننگ نا فیصلہ ءِ کرینے۔ حوال آتا رد اٹ دیوان اٹی امنائی وڑ اٹ فیصلہ مس کہ 18 می ترمیم آئین نا بشخ اسے، و ن لیگ دا بدلی نا مخ تفی ءِ کپک۔ حوالی ن لیگی راہشون پرویز رشید نا بابت پارینے کہ قومی احتساب بیورو (نیب) ترمیمی آرڈیننس آ ہراتم حکومت لائحہ عمل اس جوڑ کرے تو گڑا ن لیگ تینا ردعمل اس اتیک، و شہباز شریف اپوزیشن جماعت آتتون سلابت آن پد قومی اسمبلی نا دیوان اٹی تران کیک۔ داکان بیدس مسلم لیگ ن نا راہشون خواجہ سعد رفیق پارے کہ حکومت نا کنڈ آن 18می ترمیم نا باندات ن لیگ تون ہچ ءُ رابطہ اس کتنے، 18می ترمیم آ سجفنگ مسکہ، ولے صوبائی وتواجہی آ سمجھوتہ کپنہ۔ نیب کانود اٹی ترمیم نا 18می ترمیم تون ہچ ءُ کاریم اس اف۔ پیراگون ہاوسنگ اسکینڈل کیس اٹی پیشی آن پد میڈیا تون ہیت و گپ کرسا ن لیگی راہشون خواجہ سعد رفیق نا پاننگ ئس کہ 18می ترمیم نا باندات غوغا مننگ ءِ، ولے یات تخنگے کہ صوبائی وتواجہی آ ہچ ءُ سمجھوتہ اس بایدے مف۔ 18می ترمیم اٹی بدلی نا بابت حکومت یا پین سیاسی جماعت اس مسلم لیگ ن تون ہچ ءُ رابطہ اس کتنے، اگہ حکومت 18 می ترمیم اٹی بدلی کننگ خواہک، تو او دادے پارلیمنٹ اٹ اتے، انتئے کہ دا دن سٹی جوڑ متویسس، داڑا پارلیمنٹ اٹی سرجم شرہ مسوسس۔ ولدا گڑا داڑا عمل مسوسس۔ او پارے کہ اسہ ہیت اس پاش ءِ کہ نیب کانود اٹی ترمیم نا 18 می ترمیم تون ہچ ءُ کاریم اس اف۔نیب انا کانود تہار ءِ، جیل آتیٹی سَد آ بے گناہ تموک ءُ، سلاہ غا سجفنگ مریک، صوبائی وتواجہی آ ہچ ءُ سمجھوتہ اس مفک۔ 18می ترمیم و نیب کانود اٹی ترمیم قومی ءُ ہیت اسے، ہراتم 18می ترمیم اتنگا تو او وخت آ پنجاب تینا حق آتیان پدی مس، (ن) لیگ ہمو وخت آ چنکا صوبہ غاتے زیات واکدار جوڑ کرے۔

Get real time updates directly on you device, subscribe now.

Leave A Reply

Your email address will not be published.