کورونا وائرس نا گمانی تالانی ءِ توننگ کن لاک ڈاﺅن آ عملدرآمد المی ءِ‘ زاہد لانگو

قلات (فیض نیچاری) ڈپٹی کمشنر قلات عزت نذیر بلوچ نا خصوصی پارت آ اسسٹنٹ کمشنر و چیئرمین پرائس کنٹرول کمیٹی قلات زاہد لانگو اناگت قلات بازار نا دورہ ءِ کرے‘ نہاد لڑ ءِ ہم چیک کرے۔الس ءِ ریلیف تننگ کن دکاندارتے سرکاری نہاد لڑ آ سختی اٹ عملدرآمد نا پارت کرے۔ دورہ ناوخت آ میڈیا تون ہیت وگپ کرسا او پارے کہ روچہ مبارک اٹ کس ءِ ہم کوڑی کننگ و بلیک مارکیٹنگ نا موکل تننگپک‘ الس ءِ ریلیف رسیفنگ کن کوشست کننگ اٹی ان۔ اوپارے کہ کورونا وائرس نا سوب آن برجالاک ڈاﺅن نا خلاف ورزی ءِ ہم سگنگ مفک۔ کورونا وائرس نا گمانی تالانی ءِ توننگ کن لاک ڈاﺅن آ عملدرآمد المی ءِ‘ الس لاک ڈاﺅن اٹ انتظامیہ تون کمک کے‘ الس و پوریاگر برادری تروک پارت آتیا عمل کیر تاکہ دا ناجوڑی ءِ تالان مننگ آن توننگ مرے۔ او پارے کہ دکاندارتے پارت کننگانے کہ او روچہ مبارک و لاک ڈاﺅن نارد اٹ شیڈول نا وڑا ٹ دکان تے ملسا الس ءِ ریلیف ایتر۔