کوئٹہ گرین بس سروس ءِ ہندا سال جولائی اسکان فعال کننگک

کوئٹہ: صوبائی سیکرٹری ٹرانسپورٹ ڈاکٹر محمد اسلم بلوچ نا کماشی ٹی کوئٹہ ٹی گرین بس سروس ءِ آپریشنل کننگ نا بابت اٹ اسہ اہم ءُ دیوان اس اڈ ہلک۔ دیوان اٹ ایم ڈی ٹریفک انجیئرنگ بیورو ڈاکٹر سجاد بلوچ،چیف آرگنائزر آفیسر پی پی پی ڈاکٹر نور،ڈپٹی سیکرٹری منور احمد مگسی،سیکرٹری آر ٹی اے کوئٹہ منظور احمد،اسسٹنٹ ڈائریکٹر بلوچستان پبلک پروکیورمنٹ ریگولیٹری اتھارٹی و ایلو افسرک ساڑی ئسر۔ دیوان اٹ فیصلہ کننگانے کہ گرین بس سروس ءِ اینخو جولائی اسکان پورو وڑاٹ فعال کننگک۔ ہرانا کل انتظامک و ایلو المی کاریمک گڈیکو مرحلہ ٹی ءُ۔ ہراڑان پد باقاعدہ وڑاٹ گرین بس سروس ءِ آپریشنل کننگک۔ دا بابت اٹ اولیکو مرحلہ ٹی ساڑی ہشت بس آتے آئی ٹی یونیورسٹی آن یونیورسٹی آف بلوچستان نا نیام اٹ چلیفنگک۔ ہراڑکن فزیبلیٹی اسٹڈی کرسا بس اسٹاپ جوڑ کننگک۔ گرین با سروس پبلک پرایوئٹ پارٹنرشپ نا رداٹ پرائیویٹ آپریٹر کننگک۔ دا بابت اٹ معاہدہ اس پک کننگک۔ دیوان صوبائی سیکرٹری ٹرانسپورٹ ڈاکٹر محمد اسلم بلوچ پارینے کہ حکومت بلوچستان گرین بس سروس ءِ زوت اس آپریشنل کننگ نا بابت اٹ ہر وڑ نا گام گیج کننگ انگ ءِ۔ تانکہ شاری تے سفری آسراتی فراوان کننگے۔ دا ڈٹ اٹ اولیکو مرحلہ ٹی 8بس چلیفنگک۔ ہراکہ بلوچستان یونیورسٹی سریاب روڈ و آئی ٹی یونیورسٹی بلیلی روڈ اسکان چلینگرہ۔ تانکہ کوئٹہ نا اُلس ءِ جوان سفری آسراتی دوئی مرے۔ او پارینے کہ صوبائی حکومت ساڑی دور انا گرج آتے مون آ تخسا لوکل ٹرانسپورٹ نا جوانی کن ہر وڑ نا گام گیج کننگ اٹی ءِ۔ گرین بس سروس نا فنکشنل مننگ آن کوئٹہ نا شاری تے پوسکن آ بس و جوان ءُ چاگڑد اس رسینگے۔

(خ ن)