پٹرول نا کبینی آ پارلیمنٹ نا ہڑتوم آ ایوان تیٹی اپوزیشن نا برانز

0

Get real time updates directly on you device, subscribe now.

اسلام آباد :  پٹرول نا کبینی آ پارلیمنٹ نا ہڑتوم آ ایوان تیٹی اپوزیشن نا برانزو واک آؤٹ کرے۔ سرجم حوال آتا رد اٹ قومی اسمبلی نا دیوان ڈپٹی اسپیکر قاسم سوری نا کماشی ٹی بنا کرے تو اپوزیشن پبی تیاری اٹ دیوان اٹ سر مس۔ اپوزیشن باسک آتا دوٹی بینر و پلے کارڈ آک ئسرہ، ہرافتیا پٹرولیم مصنوعات نا نہاد آتیٹی نن نیمہ غا ودکی ءِ پدی ہلنگ نا خواست کننگاسس۔ حکومتی باسک آتے سما ئس کہ کبینی نا سوب آن اپوزیشن بھلو برانز اس کیک، ہندا سوب آن وزیر تا بھلو کچ اس دیوان اٹ ساڑی اَلو۔ دیوان نا بنا مننگ تون مسلم لیگ ن نا پارلیمانی لیڈر خواجہ آصف ایوان اٹی گپ و تران کرسا حکومت ءِ جوان شیف خلک و شندا تے۔ او پارے کہ نن نا تہاری ٹی پٹرول نا بمب بٹنگانے۔ ریلیف پیکیج نا اسُل عجب ءُ وڑ اس مس، کبینی آسمان آ سر مسنے۔ حکومت ءِ الس نا دڑد و ڈکھیائی تا اسُل درک اف۔ 160 روپئی کلو بورہ نا نہاد مسنے۔ دا امر ءُ حکومت اسے، امر ءُ قول و کرار ءُ تے۔ او پارے کہ ’وزیراعظم نا چار وڑ انا تران سوشل میڈیا غا چلینگ انگ ءُ۔ الس تون درو مسنے۔ 2018ء نا گچین کاری الس تون تاریخی ءُ درو اس ئسکہ۔ الس نا ڈکھیائی تے کم کننگ نا جاگہ غا پینو دفنگانے۔ دا ایوان کبینی نا نوٹس ءِ ہلے۔ ملک ءِ دنا دوٹی تننگانے؟ ملک اتون انت مننگ اٹی ءِ؟ ننا زمواری ءِ کہ پارلیمان نوٹس ہلے۔ دیوان اٹی وزیراعظم و وزیر تیان بیدس اپوزیشن لیڈر شہباز شریف و بلاول بھٹو زرداری ہم بتویسر۔ ایلو کنڈ آ سینیٹ نا دیوان چیئرمین سینیٹ نا کماشی ٹی بنا کرے، تو اپوزیشن لیڈر سید یوسف رضا گیلانی گونڈ ءُ نوٹس اسے آ دیوان ءِ بٹنگ انگ و پیٹرولیم مصنوعات نا نہاد آتیا برانز کرے۔ او پارے کہ ’وزیراعظم یکم نومبر آ اوگرا نا کند آن پیٹرولیم مصنوعات نا نہاد آتے ودفنگ نا سلاہ ءِ مسترد کرے۔ وزیراعظم قوم آن تران اٹی پارے کہ پٹرول نا نہاد ءِ ودفنگک۔ و ولدا چل و ہشت گھنٹہ ٹی پیٹرولیم نا نہاد آک ودار۔ وزیراعظم ریلیف پیکیج نا پڑو کرے، بھاز جوان کرے، ولے داسہ پٹرول نا نہاد اٹ ودکی آن مچ آ ریلیف چٹانے۔ اپوزیشن جماعت آتا باسک آک پارلیمان نا ہڑتوم آ ایوان تیٹی کورک ءِ پیدوار کریر، ہراڑا دیوان ملتوی کننگا۔ یات سلے کہ جمعہ نا نن پیٹرولیم مصنوعات نا نہاد آتیٹی ودکی نا اناگت پڑو آن پد جمعہ نا دے سینیٹ و قومی اسمبلی نا دیوانک مسر، تو ہڑتوم آ ایوان تیٹی اپوزیشن نا کنڈ آن پبی برانز کننگا، کل انا گمان پک ئس کہ بھلو برانز اس مننگ کیک، ہندا سوب ئس کہ ہڑتوم آ ایوان تیٹی حکومتی باسک و وزیر تا کچ اسُل کم ئسکہ۔ و ہڑتوم آ ایوان تا دیوانک اپوزیشن برانز کننگ آن پد کوروم نا پورو مفننگ آ پد بٹنگار۔

Get real time updates directly on you device, subscribe now.

Leave A Reply

Your email address will not be published.