لاہور، پر تا 30 سال نا ریکارڈ پنا، شکست آتیٹی 7 بندغ زوال

لاہور/ اسلام آباد: لاہور اٹ پِر تا 30 سال انا ریکارڈ پنا‘ شار انا شار انا سڑک آک تلاپ جوڑ مسر۔کینال روڈ آ ڈور انا دیر سڑک آتیا پیش تما‘ چائنا اسکیم و گڑھی شاہو ٹی پِرانا دیر اُرا و دکان تے ٹی پترینگا۔پِر انا سوب آن چھت تمنگ و کرنٹ لگنگ و ایلو واقعہ غاتے ٹی 2 چنا و نیاڑی تون اوار 7 بندغ زوال مسر۔ محکمہ موسمیات پیش گوئی کرینے کہ لاہور اٹ اینو ننکان 9 بجہ غا پِر انا اسہ پین اسپیل اسے نا گمان ارے۔ نگران وزیراعلیٰ پنجاب محسن نقوی پارینے کہ کوشست کینہ کہ ننکان پِر آن مست سہب انا پِر انا دیر ءِ کشن۔ لاہوراٹ مروک پِر انا سوب آن زوال مروک آتا کچ ہفت مسنے۔ مصری شاہ ٹی چھت انا تمنگ آن اَرے زئیفہ و چناس زوال مسر‘ چونگی امرسدھو ٹی بجلی نا تار انا دیر اٹ تمنگ آن کرنٹ ہلنگ آن اسہ ورناس زوال مس‘ ایلو کنڈآ باغبان پورہ ٹی کھمبہ ٹی کرنٹ بننگ آن ورناس احتشام زوال مس۔ ہنجروال ات ہم یانزدہ سال انا چناس دیر اٹ کرنٹ ہلنگ آن دم تس۔ وزیراعظم شہباز شریف پنجاب حکومت ءِ طوفانی پِر آن پد دمدستی گام گیج نا پارت کرسا پارے کہ ضلعی انتظامیہ، ریسکیو 1122، پی ڈی ایم اے، میونسپل و تعلقدار ادارہ غاتا شریداری اٹ المی گام گیج کننگے۔ چارشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم شہباز شریف وزیراعلیٰ پنجاب ءِ کمکی ٹیم تے دمدستی متحرک کننگ نا پارت کرے۔ اوپرمان کرے کہ ضلعی انتظامیہ، ریسکیو 1122، پی ڈی ایم اے، میونسپل و تعلقدار ادارہ غاتا شریداری ءِ پک کننگے، شاری تا جان و مال انا رکھ اکن غٹ گام گیج آتے کننگے۔ اوضرورت تمنگ آ این ڈی ایم اے و بنجائی ادارہ غاتے پنجاب حکومت ءِ پبی کمک فراوان کننگ نا ہم پارت کرے۔ وزیراعظم پارت کرے کہ شاری تے خبڑدار کننگ، ٹریفک نا گیگ بدل بست وبند و دِیر انا کشنگ کن المی گام گیج آتے پک کیر۔ وزیراعظم ملک انا ایلو بشخ آتیٹی ہم بشام نا پِرتیٹی پیشگی رکھی بست وبند کننگ نا پارت کرے۔ اوپارے کہ این ڈی ایم اے پی ڈی ایم اے صوبائی و ضلعی انتظامیہ نا شریداری اٹ پیشگی بست وبند آتیٹی کمک فراوان کیر۔ خلقی علاقہ غاتیٹی شاری تا وخت آ رکھ ہند آتیا گدریفنگ، ساہدار تے بچفنگ کن گام گیج کننگے۔ وزیراعظم اربن فلڈنگ آن بچفنگ کن دمدستی و المی گام گیج آتے ترند کننگ نا ہم پارت کرے۔ وزیراعظم گلگت بلتستان، آزاد کشمیر، خیبرپختونخوا تون اوار غٹ مشی آ علاقہ غاتیٹی انتظامیہ ءِ متحرک کننگ و غٹ گام گیج آتیان وزیراعظم آفس ءِ مطلع تخنگ نا ہم پارت کرے۔

(مانیٹرنگ ڈیسک/اے پی پی)