تحریک انصاف نا تیناک پانامہ سازش نا پت ءِ پاش کریر، مریم اورنگزیب

اسلام آباد:  بنجائی حوالکاری و شینکاری وزیر مریم اورنگزیب پارینے کہ تحریک انصاف نا تیناک پانامہ سازش نا پت ءِ پاش کریر، سازشی ٹولیک اسہ نابود اسے بیٹ کرسا ملک ءِ بھسکاری نا کنڈ آ دریر، ملک انا ویل آتا ایسر بیرہ نواز شریف تون ءِ، اودے پاکستان نا الس وونٹ ترسا مسٹ میکو وار وزیراعظم گچین کرے، نواز شریف دور اٹی زرگزران سوگو مس، الس ءِ سی پیک نا ٹیکی ءِ تس، ملک انا بھلو خذمت اسے کروک آڑتون بھلو زیادتی اس مس، ہراشکل آک و کڑد اینو ملک ءِ ہُشنگ ءُ، دا2013-14ٹی سی پیک ڈٹ ءِ توننگ کن کنٹینر آتیا سلوک ئسر۔ چارشنبے نادے آ داڑے پریس کانفرنس آن تران کرسا بنجائی وزیر حوالکاری پارے کہ اینو 5 جولائی نادے ءِ و اینو نادے اسہ آمر شہید ذوالفقار علی بھٹو نا حکومت آ شب وخون خلسا جمہوریت نا خون ءِکریسس، اینو کیپٹن کرنل شیرخان شہید نا برسی نا ہم دے ءِ و اینو سی پیک نا دہ سال ہم پورو مننگ ءُ۔ اوپارے کہ سی پیک پاکستان و چین نا سرکڑدہ غاتا ڈیہہ و پاکستان نا الس کن ٹیکی اسے، دا ڈٹ قائد محمد نواز شریف و صدر شی جن پنگ نا وژن ءِ۔ اوپارے کہ سی پیک ڈٹ پاکستان ءِ 2013ء آں 2018 ء اسکان ہر بشخ اٹی شون تس ولے تدوک آ چار سال اٹی اسہ سازشی، نابود، نالائق و دُز اس ملک ءِ بیرہ بھسکاری نا کنڈا درے۔ اوپارے کہ وزیراعظم شہباز شریف سیوتی حکومت تون اواری اٹ تدوک آ اسہ سال اٹی ملک انا زرگزرانی بھسکاری، بدحالی، بے روزگاری، لوڈشیڈنگ و دہشت گردی ءِ چٹفنگ ناکوشست آتیٹی لگوک ءِ۔ اوپاریے کہ سازشی زموار آک اسہ نابود، نالائق و دُز اسے ملک آ مسلط کریر، دا کِسہ بیرہ چار سال انا اف، دانا بنا2013ء ٹی مسوسس۔ 2013ء ٹی ہم ملک انا تہہ ٹی کبینی، دہشت گردی، بے روزگاری ئسک۔ اوپارے کہ نواز شریف ملکی زرگزران ءِ سوگوی تس، آئی ایم ایف ءِ خیر آباد پارے، 2017ء ٹی ملک شونداری نا کنڈا ہناسس۔ اوپارے کہ ملکی تاریخ نا اسٹ انگا آئی ایم ایف پروگرام ئس ہرا نواز شریف نا دور اٹی پورو مس۔

(اے پی پی)