بلوچستان نا الس ءِ بایدے سیاسی آجوئی رسینگے، ڈاکٹر مالک بلوچ

تربت :  نیشنل پارٹی نا بنجائی صدر ومسکوہی وزیراعلی بلوچستان ڈاکٹرعبدالمالک بلوچ تجابان لٹریری فیسٹیول آن تران کرسا پارے کہ نیشنل پارٹی ءِ ہراتم ہم اقتدار رسینگا نن داڑے تعلیم‘ جانجوڑی نا بشخ آتتون اوار بارڈر ٹریڈ نا نظام اٹ گچینی اتینہ۔ اوپارے کہ وخت بسنے کہ بلوچستان نا الس نیشنل پارٹی ءِ سوگو کے و ورناک نیشنل پارٹی نا واک جوڑ مریر تاکہ نن گچین وڑ اٹ بلوچ کرک‘ وسیلہ غاتا رکھ ءِ کننگ کین‘ اوپارے کہ بلوچ الس ءِ اسیجا مرسا ٹھپہ مافیا نا کسر ءِ توروئی مریک‘ او پارے کہ ورناک ملک انا آخبت ءُ و ورناتیکن تعلیم نا پڑ آ بھاز آ وارخواہیک اریر‘ ہراتم ہم الس نیشنل پارٹی ءِ مینڈیٹ تس تو داڑے نئے بیرہ بیرہ امن مریک بلکہ شونداری ناعمل ہم مونی کاہک و تعلیم وجانجوڑی نا بشخ آتے ٹی نن مون آ کانہ۔ او تجابان نا ورناتامنت ءِ ہرفے و اوفتے مبارکبادی تس ہرافک کلچرل اینڈ ایجوکیشنل فیسٹیول ءِ اڈ تسر۔ او پارے کہ ننا مسڑ مریم ضیاء ہم ہندا علاقہ غان ءِ و او جہانی ادارہ غاتے ٹی گچین وڑ اٹ کاریم کننگ اٹی ءِ و اگہ دا جاگہ نا ورناک تعلیم آ چکار کیر تو او پین مونی ہننگ کیرہ۔ دود آن نیشنل پارٹی نا بنجائی سیکریٹری جنرل ومسکوہی ایم پی اے جان محمد بلیدی تران کرسا پارے کہ ورناک ورناک دا مشکل وخت اٹ تینا قومی زمواری تے پُہہ مرسا گچین ءُ پروگرام اس اڈ تسنو ہراکہ مبارکبادی کڑزک۔ اوپارے کہ ہرا بندغ آک راجی بدلی اتنگ خوارہ و سیاست اٹ بدلی اتنگ خوارہ اوفتیکن لٹریچر و تاریخ نا خواننگ المی ءِ۔ اوپارے کہ ننا ورناتے قومی ویلیو تا سماءِ و او شونداری نا عمل اٹ تعلیم ناپڑ آ اوار ءُ‘ او پارے کہ نئے بیرہ دا علاقہ ٹی بلکہ مچ آبلوچستان اٹ تعلیمی ادارہ غاتا جوڑ کننگ نا کریڈٹ ڈاکٹرعبدالمالک بلوچ کن کاہک ہراتم او وزیراعلیٰ ئس‘ ولے ہراتم او وزیراعلی جوڑ مس تو او کوالٹی ایجوکیشن آ چکار کرے۔ او اخیراٹ پارے کہ بلوچستان نا الس ءِ بایدے سیاسی آجوئی رسینگے تاکہ او تینا نمائندہ غاتے تینامنشا اٹ گچین کننگ کیر

(آن لائن)