گورنر وڈھ آ ہنا، سردار مینگل تون اوڑدہی، بے چیٹ حالیت آتیا مجلس

تحصیل وڈھ :  گورنر بلوچستان ملک عبدالولی خان کاکڑ چار شنبے نا دے خضدار نا تحصیل وڈھ اٹ بلوچستان نیشنل پارٹی نا قائد سردار اختر جان مینگل نا ہنکین آہنا و اوڑتون اوڑدہی کرے‘ اوڑدہی ناوخت آ ملک انا حالیت‘ تحصیل وڈھ نا بے چیٹ حالیت و ڈیہہ اٹ مروک بدلی تتون اوار تین پہ تینی استخواہی تا امورتیا گپ وتران کننگا۔دا وخت آ گورنر بلوچستان ملک عبدالولی خان کاکڑ پارے کہ صوبہ ٹی کرن آتیان آباد قوم قبیلہ غاتے اسٹ ایلو تون شیر و شکر تخنگ‘ الس ءِ سیاسی شعور تننگ‘ السی حق و واکداری تا خیال ءِ کننگ و اوفتے روشنا آخبت نا کسر آروان کننگ کن ننا سیاسی سرکڑدہ غاک بے کچ خذمت کرینو و قربانی تسنو۔ دا رد اٹ حکومت نازمواری ءِ کہ او مچ آصوبہ ٹی امن و ایلمی نا چاگڑد ءِ برجا تخنگ اٹ کڑدار ادا کے و دا ہم حکومت نا فرض مریک کہ او سہی ءِ سہی و غلط ءِ غلط پائے و دا ویل انا زوت ایسر اس کشے۔گورنر بلوچستان پارے کہ بلوچستان اٹ قبیلہ و فرقہ غاتا بابت ساڑی حساسیت ءِ سنجیدہ ہلنگ و ایسر کننگ نا گرج ءِ انتئے کہ شونداری وشونہالی بیرہ پرامن قوم و قبیلہ غاتا جوڑ مننگ کیک۔ اوپارے کہ اسہ غریب و پدتموک صوبہ پین قبائلی جھیڑہ‘ خار وتعصب آتے سگنگ کپک۔ گورنر بلوچستان پارے کہ پشتون بلوچ ہمو خوش قسمت قوم تیان ءُ ہرافتا سیاسی سرکڑدہ غاک تین پہ تینی جنگ انا کسر ءِ السا جم امن و شونداری ءِ تینا زند انا مسخت جوڑ کرسا مونی گام کرینو‘ نن اینو ہم تینا سیاسی سرکڑدہ غاتا رند ءِ ہلسا بشردوستی، ترقی پسندی و رواداری نا روادار ان۔ گورنر بلوچستان دا ہیت آ یقین نا درشانی ءِ کرے کہ ننا سیاسی سرکڑدہ‘ عالم دین‘ مشائخ عظام و قبائلی سرکڑدہ غاک الس دوست ءُ و او جم فائدہ کن پرامن بلوچستان و روشنا آخبت کن گچین ءُ لائحہ عمل اس پک کننگ کیرہ۔ گورنر بلوچستان ملک عبدالولی خان کاکڑ پارے کہ بلوچستان نا اسہ آئینی سروک نا وڑ اٹ کنے بھلا چیلنج آتتون مون تروئی ءِ دا رد اٹ نما کل انا کمک نا گرج ءِ۔

(خ ن)