لس گچین کاری، مسلم لیگ (ن) نا کس اتون سیوت کپننگ نا پڑو

اسلام آباد : بنجائی وزیر میاں جاوید لطیف پارینے کہ پاکستان مسلم لیگ (ن) بروک آ لس گچین کاری تیٹی اسہ جماعت اسے تون ہم سیوت کپک، سیٹ ایڈجسٹمنٹ کننگ مریک ولے گڈیکو فیصلہ ءِ نواز شریف کیک، مسلم لیگ (ن) بروک آ لس گچین کاری تیٹی دوتہائی گیشتری دوئی کیک، نواز شریف دبئی ٹی تولوک پلان جوڑ کپننگ ءِ بلکن ملک ءِ زرگزرانی تنکی آن کشنگ کن کوشست کننگ اٹی ءِ، 9 مئی نا مرکزی کڑد انا برخلاف مقدمہ نوشتہ کرسا کارروائی کننگتو تو دا انصاف نا خواست و انصاف فراوان کروک آ ادارہ گاتا کڑد آ اسہ سوج انا نشان اس مریک۔ سے شنبے نادے آپریس کانفرنس آن تران کرسا اوپارے کہ پی ٹی آئی نیازی ٹولی نا چیئرمین نا پاننگ ءِ کہ کورو کمیٹی ٹی کروک آ ڈٹ بندی آن غٹ بے سما الور اوفتیان بھاز انگا مخلوق ءِ کنا ڈٹ سازی نا سمائسک۔ اوپارے کہ اسہ ادارہ سے نا کنڈان خوداحتسابی کننگا۔ اوپارے کہ اگہ وخت آ ننا ہیت ءِ بِننگاکہ تو 9 مئی نا سانحہ متوکہ۔ اوپارے کہ 9 و 10 مئی نا واقعہ نا مرکزی کمکار و کڑد انا برخلاف مقدمہ انت اکن درج متو۔ اسہ ادارہ سے نا کنڈآن خوداحتسابی قوم اکن جوان ءُ کلہو اسے۔ عدلیہ ہم 9 مئی نا واقعہ نا بایدے نوٹس ءِ ہلے۔ ایلو کنڈ آ وزیر خزانہ سینیٹر اسحاق ڈار پارینے کہ نواز شریف نا گچین کاری تے ٹی بشخ ہلنگ آ رکھ چٹانے‘ پوسکن آ کانود نا رد اٹ او گچین کاری تے ٹی بشخ ہلنگ کیک۔ نجی ٹی وی تون ہیت وگپ کرسا او پارے کہ نواز شریف متحدہ عرب امارات آن عمرہ کننگ کن سعودی عرب آہننگ اٹی ءِ ہراکان گڈ او انگلینڈ آ کاہک۔ اسحاق ڈار مسکوہی وزیراعظم نا وطن آ پدی بننگ نا بابت پارے کہ ہراتم پارٹی پارے نوازشریف انگلینڈ آن پاکستان آبریک۔ نواز شریف آ ہمو کیس ئس ہراٹی مریم نواز بری مسنے‘ داسہ نواز شریف ہم یلہ مریک۔

(اے پی پی/ آن لائن)