حکومت نا کنڈ آن 7 جولائی آ یوم تقدیس قرآن اڈ تننگ نا پڑو

اسلام آباد :  حکومت 7 جولائی آ یوم تقدیس قرآن اڈ تننگ و سویڈن واقعہ نا برخلاف مچ آ ملک اٹ برانز کننگ نا پڑو کرے وخت اس کہ وزیراعظم شہباز شریف دا باندات آ پارلیمنٹ نا اسیجائی دیوان ءِ بٹنگ انگ نا فیصلہ ہم کرینے۔وزیراعظم شہبازشریف ناکماشی ٹی اہم ءُ دیوان اس اڈہلک‘ ہراٹی سویڈن اٹ قرآن کریم نا بے حرمتی نا باندات آ سجفنگا‘ دیوان اٹ فیصلہ کننگا کہ جمعہ 7 جولائی آ یوم تقدیس قرآن ا ڈتننگک و سویڈن واقعہ نابرخلاف مچ آ ملک اٹ برانز مریک۔ وزیراعظم کل جماعت آتتون اوار مچ آقوم آ برانز اٹ بشخ ہلنگ نا خواست کرے وپارے کہ مچ آ قوم اسیجا مرسا شیطانی ذہن تے کلہو ایتک۔ شہبازشریف پارے کہ جمعہ نادے مچ آ ملک اٹ سویڈن واقعہ نا مذمت اٹ برانزی ریلی اڈ تننگے‘ داکان بیدس وزیراعظم پنچ شنبے نادے پارلیمنٹ نا اسیجائی دیوان بٹنگ انگ نافیصلہ ہم کرینے۔ وزیراعظم پرمان کرے کہ پارلیمنٹ نا اسیجائی دیوان اٹ سویڈن واقعہ غا قومی لائحہ عمل ترتیب تننگے‘ پارلیمنٹ نا فورم آن قوم انا جوزہ و احساس آتا پبی ترجمانی ءِ کننگے او پرمان کرے کہ پارلیمنٹ نا اسیجائی دیوان اٹ اسیجائی قرارداد منظور کننگے۔ دیوان آن تران کرسا وزیراعظم پارے کہ قرآن کریم نا عزت وحرمت ننا ایمان نا بشخ اسے‘ داڑکن نن کل اسٹ ان‘ گمراہ انگا ذہن اسلاموفوبیا نا منفی رجحان ءِ تالان کرسا پراگندہ ایجنڈا غا عمل کننگ اٹی ءِ۔ او پارے کہ مچ آدنیانا امن پسند، اسٹ ایلو نا بقاء آباور کروک آقوم و سرکڑدہ غاک اسلاموفوبیا نا گواچی و مذہبی تعصب کروک آتا کسر ءِ تورر۔ اوپارے کہ مذہب، مقدس ہستی، عقیدہ و نظریات آتے شست کروک بیدادی آساڑی ذہنک دنیانا امن کن گڑتی اسے ءُ‘ جہانی کہول آ پرامن، بریبری و بین المذاہب ہم آہنگی آ باور کروک واکدار آک اسیجائی اٹ دا وڑ انا رجحان و واقعہ غاتے توننگ کن کاریم کیر۔ وزیراعظم پاکستان مسلم لیگ (ن) ءِ جمعہ نادے یوم تقدیس قرآن اٹ پبی وڑ اٹ بشخ ہلنگ و مچ آ ملک اٹ برانزی ریلی اڈ تننگ نا پرمان ہم کرے۔

(مانیٹرنگ ڈیسک)