پاکستان و جاپان نا ہاؤسنگ اور انفراسٹرکچر نا پروگرام آتیا کاریم آ امنا

اسلام آباد : وزیر خارجہ بلاول بھٹو زرداری جاپان نا وزیر خارجہ ناسلہ غا جاپان نا دورہ ءِ کرے۔ وزیرخارجہ بلاول بھٹو زرداری نا چار دے انا سرکاری دورہ نا اعلامیہ ءِ جاری کننگانے‘ اعلامیہ نا رد اٹ ٹوکیو ٹی وزیر خارجہ وزیر خارجہ و جاپان نا وزیراعظم تون اوڑدہی کرے‘ ہڑتوم آ وزیر خارجہ غاک تین پہ تینی تعلقداری نا کل پہلوتیا گپ وتران کریر‘ اوڑدہی ناوخت آ واپاری‘ زرکاری‘ رکھی کمک‘ تعلیم، سائنس و ٹیکنالوجی آ گپ وتران کننگا‘ کسبی ہیلکاری و پاکستان آن جاپان ءِ افرادی قوت نافراوانی آ ہم ہیت وگپ کننگا‘ اوڑدہی تا وخت آ علاقائی وجہانی امورتیا ہم ہیت وگپ کننگا‘ ہڑتوم آ پڑک آک ہیت وگپ و تین پہ تینی کمک ءِ پین ترند کننگ آ امنا کریر‘ وزیرخارجہ غاک نوکاپ آن زہمی علاقہ خاص وڑ اٹ شمسی توانائی وسَفا انگا دیر انا فراوانی نا ڈٹ آتیا ہیت کریر‘ ہڑتوم آ پڑک آک ہاؤسنگ و انفراسٹرکچر نا پوسکن تفنگ نا پروگرام تیا اواری اٹ کاریم کننگ آ امنا کریر۔ ہنرمند افرادی قوت کن پاکستان اٹ جاپانی زبان کن لینگویج سکل ٹیسٹ کرفنگ آامنائی کننگا۔ وزیر خارجہ بلاول بھٹو زرداری ایشیائی شونداری بینک انسٹی ٹیوٹ آن تران کرے‘ وزیرخارجہ علاقائی رابطہ و اقتصادی کمک نا پاکستان نا وژن نابارو اٹ ہیت کرے۔ وزیرخارجہ تین پہ تینی تعلقداری نا اہمیت و گچینی آ زور شاغا۔ بلاول بھٹو اسیجائی اٹ سوگو و گچین موثر انفراسٹرکچر نیٹ ورک ٹہیفنگ آ زور شاغا۔ وزیر خارجہ جاپانی کاروباری ادارہ غاتا سروک‘ جاپان انٹرنیشنل کوآپریشن ایجنسی و جاپان ایکسٹرنل ٹریڈ آرگنائزیشن نا نمائندہ غاتتون ہم اوڑدہی کرے‘ بلاول بھٹو جاپانی سول سوسائٹی نا سرکڑدہ باسک آتتون ہم اوڑدہی کرے۔

(آن لائن)