نن تعلیم، زبان و ادب نا شونداری ءِ اولیت ایتنہ، ثناء بلوچ

خاران بھاز زُو بلوچستان نا زبان و ادب نا بابت شوندار انگا علاقہ مریک، نصیر کبدانی لبزانکی دیوان نا پوسکن آ بلڈنگ نا بنائی دود آن تران

0

Get real time updates directly on you device, subscribe now.

خاران :  صوبائی اسمبلی نا باسک ثناء بلوچ پارینے کہ زبان و ادب نا شونداری کن نصیر کبدانی لبزانکی دیوان نا سنگت آتا کوشست آک ستا کڑزرہ۔ دا خیال آتادرشانی ءِ صوبائی اسمبلی نا باسک ثناء بلوچ نصیر کبدانی لبزانکی دیوان کن پوسکن آ ماڑی نا بنائی دود آن تران کرسا کرے۔ اوپارے کہ نن تعلیم‘ ادب و زبان ناشونداری ءِ اولیت ایتنہ‘ ہراڑکن نن کوشست کننگ اٹی ان و انشاء اللہ خاران بھاز زو تعلیم ادب و زبان نا بابت بلوچستان نا شون ہلوک ضلع مریک۔ دود آن بی این پی نا مسکوہی صدر ممبر بورڈ آف ڈائریکٹرز کیسکو و پندار چیئرمین ڈسٹرکٹ کونسل حاجی میر محمد جمعہ کبدانی، نصیر کبدانی لبزانکی دیوان ایگزیکٹو کمیٹی نا چیئرمین احمد مہر، صدر قیوم سادگ اسک تران کرسا پاریر کہ خاران اٹ ادب و زبان نا بابت نصیر کبدانی لبزانکی دیوان نا کوشست آک بھاز ءُ‘ بھاز کم وسیلہ غاتے ٹی بلوچی زبان اٹ کتاب شینک کننگ ستا کڑزوک ءُ گام اسے‘ داڑان ادبی و زبان دوست چاگڑد آن ورنا چین ءِ بلوچی زبان خواننگ و نوشتہ کننگ نا وارخواہی رسینگک۔ اخیر اٹ صوبائی اسمبلی نا باسک ثناء بلوچ نصیر کبدانی لبزانکی دیوان نا پوسکن آ بلڈنگ کن فرنیچر و صوبائی حکومت آن نصیر کبدانی اکیڈمی کن سالانہ گرانٹ نا منظوری کن ہم کمک نا باور کرفے۔داوخت آ بی این پی نا آرگنائزنگ کمیٹی نا باسک علاقہ نا متبر پارٹی کارندہ اوڑتون اوار ئسر۔ داکان بیدس سنگت اکیڈمی خاران ناکنڈآن ادبی دود فٹسال گراؤنڈ اٹ اڈ ہلک‘ دود انا خاص انگا مہمان میونسپل کمیٹی نا چیئرمین میرنورالدین نوشیروانی ئس‘ دود اٹ مسہ سیشن اڈتننگا‘ اولیکو سیشن اٹ ”رژن ِ چڑکہ“ نا سرحال آ چیئرمین میر نورالدین نوشروانی توقیر زرمبش، اشفاق احمد ایڈووکیٹ سفر خان راسکوئی، بابو ظاہر احمد حسین زئی وایلوفک شرہ کریر‘ ارٹمیکو سیشن اٹ مشاعرہ مس‘ ہراٹی لقمان میر، توقیر زرمبش، ضیا شفیع شاہ غیاث شاہ، اصغر صفی الیاس سادگ، عطا شاد مزمل حسین شیئر بنفیر وخت اس کہ مسٹمیکو سیشن اٹ میوزیکل پروگرام اڈ تننگا۔ دود آن تران کرسا میر نورالدین نوشروانی پارے کہ خاران ناگلزمین علم و ادب نا بابت بھاز پربھرم ءِ‘ ننے تینا علمی ادبی و پٹ وپولی ادارہ غاتے زندہ تخنگ و فعال کننگ کن مون آبروئی مریک‘ علم و ادب زندہ انگا قوم تا میرات ءِ‘ پوسکن آ چین ءِ علم و شعور ناکنڈآ اتنگ کن دا وڑانا پروگرام اڈ تننگ وخت انا گرج ءِ۔ ننے زبان و ادب نا شونداری کن اواری اٹ کاریم کروئی مریک۔ او سنگت اکیڈمی کن پنجا ہزار روپئی و مسہ کتاب شینک کننگ نا باوری کرفے۔ اخیر اٹ میوزیکل پروگرام مس ہراٹی بلوچستان نا پنی آ شیئر پاروک عنایت گل، فرید خارانی، علی بلوچ وایلوفک تینا ازم نا درشانی ءِ کریر۔

(آن لائن)

Get real time updates directly on you device, subscribe now.

Leave A Reply

Your email address will not be published.