چاگڑد نا سفائی ننا بنداوی زمواری ءِ‘ وزیراعظم

لاہور: وزیراعظم محمد شہباز شریف پارینے کہ پاکستان پلاسٹک نا کچٹی نا ویل اتون مون تننگ کن پلاسٹک نا ریسہ وار چٹفنگ کن سنبرینگوک ءِ، بروک آ چین تیکن ساف ستھرا چاگڑد اس فراوان کننگ ننا بنداوی زمواری ءِ۔ دوشنبے نادے آچاگڑد نا جہانی دے انا وخت آ تینا ٹویٹ اٹی وزیراعظم پارے کہ پاکستان پلاسٹک نا کچٹی تون مون تننگ کن پلاسٹک نا اسہ وار اس کاریم اٹ اتنگ آن پد اونا چٹفنگ ن جہانی برادری نا کوشست آتیٹی اوار مننگ نا بابت تینا عزم ءِ پوسکن کیک۔ حکومت پلاسٹک نا کچٹی نا چٹفنگ کن کانودی وڑاس مرتب کننگ نا بابت قومی و جہانی فریق آتون فعال وڑاٹ کاریم کننگ ءِ۔ اوپارے کہ دا ہیت خوشی نا سوب ءِ کہ اسلام آباد اٹی پلاسٹک نا کاریم اٹ اتنگ نا ممانعت نا بابت 2023نا ریگولیشن آ کاریم کننگ انگ ءِ و دا ضابطہ نا رداٹ جوان فریم ورک اٹی پلاسٹک نا کاریم اٹ اتنگ ءِ ریسہ وار چٹفنگ کن مدانا تعین ءِ کننگک۔ اوپارے کہ اینو نادے راج انا غٹ تپہ حیاتیاتی تنوع نا رکھ اکن یکجا مریرو ری سائیکلنگ نا گام گیج آتے سرسہب کننگ کن شعور تالان کیر۔ اوپارے کہ بروک آچین تیکن ساف ستھرا چاگڑد اس فراوان کننگ ننا بنداوی زمواری ءِ۔

(اے پی پی)