بلوچستان بنجا ناکمک آن بیدس شون ہلنگ کپک‘حاجی نورمحمد دومڑ

کوئٹہ/اسلام آباد: بلوچستان عوامی پارٹی نا صوبائی جنرل سیکرٹری سنیئر صوبائی وزیر ڈٹ بندی و شونداری حاجی نورمحمد خان دمڑ پارینے کہ بلوچستان ءِ دوئی مالی ویل آتا ایسری و صوبہ ٹی بنجائی ڈٹ آتیا عمل درآمد و پوسکن آ بجٹ اٹ برجا و پوسکن آ ڈٹ آتے اوار کننگ کن اسلام آباد اٹ بنجائی وزیر ڈٹ بندی و شونداری احسن اقبال، بنجائی سیکرٹری پلاننگ تون اوڑدہی کرسا اوفتے بلوچستان نا ساڑی مالی حالیت آتیان معلومدار کرینے۔ بنجائی سیکرٹری پلاننگ سید ظفر علی شاہ تون ارا اوڑدہی کرینے۔ کوشست ءِ کہ وزیراعظم میاں شہباز شریف تون اوڑدہی کرسا بلوچستان نا مالی حالیت آتیان معلومدار کرسا بنجائی وزیر و بنجائی سیکرٹری پلاننگ تون اوڑدہی ٹی بلوچستان نا مالی حالیت آتے برجا و پوسکن آ شونداری ڈٹ آتے بجٹ اٹ اوار کننگ آن بیدس بلوچستان آن نوکاپ نا زہمی تا بحالی زہمی آ بنداوی جون نا جوڑی تون اوار جتا جتا ویل آتیا ہیت وگپ کننگانے بنجائی سیکرٹری پلاننگ تون اوڑدہی نا وخت آ چیف سیکرٹری بلوچستان عبدالعزیز عقیلی ہم ساڑی ئس دا خیال آتا درشانی ءِ او تینا بیان اسے ٹی کرے۔ سنیئر صوبائی وزیر ڈٹ بندی و شونداری حاجی نورمحمد خان دمڑ پارینے کہ بلوچستان نا شونداری بنجائی حکومت نا کمک آن بیدس ممکن اف۔ ننے اومیت ءِ وزیراعظم پاکستان و بنجائی حکومت این ایف سی نا رداٹ بلوچستان نا آئینی شار و بنجائی و بنجائی ڈٹ آتیکن درکار فنڈ آتا جاری ءِ پک کیک۔ او پارینے کہ اسہ ہفتہ غان زیات بنجائی درالحکومت اسلام آباد اٹی اُٹ و کوشست ءِ کہ پوسکن آ بنجائی بجٹ اٹ بلوچستان نا پد تمننگ نا ایسری کن زیات شونداری ڈٹ آتے اوار کننگے۔

(آن لائن)