سپریم کورٹ نا پرمان، پنجاب اٹ لس گچین کاری تا شیڈول جاری

اسلام آباد : الیکشن کمیشن آف پاکستان سپریم کورٹ نا پرمان آ پورو کرسا 14 مئی آ پنجاب اٹ لس گچین کاری کرفنگ نافیصلہ کرینے‘ دا رد اٹ گچین کاری تا شیڈول ہم جاری کننگا‘ پندار کاغد آتے ٹی اپیل دائر کننگ نا گڈیکو تاریخ 10 اپریل مریک وخت اس کہ پنجاب نا نگران حکومت تون انتظامی و سکیورٹی باندات آتیا سلاہ کننگک‘ وخت اس کہ فنڈ و ایلو تعلقدار امور تیکن زوت بنجائی حکومت تون رابطہ کننگک‘ حوالی نا رد اٹ الیکشن کمیشن نا دیوان چیف الیکشن کمشنر سکندر سلطان راجہ ناکماشی ٹی چار شنبے نا دے اڈ ہلک‘ ہراٹی سپریم کورٹ نا کنڈآن پنجاب و خیبر پختونخواہ ٹی گچین کاری تا بابت سوموٹو کیس اٹ تروک فیصلہ غا سلاہ کننگا۔ سپریم کورٹ ناکنڈآن گچین کاری تیکن تروک شیڈول نا جاچ ءِ ہلنگا‘ وکیل آک 14 مئی آ گچین کاری کرفنگ نا عدالتی پرمان آ بریفنگ تسر‘سلابتی دیوان اٹ فیصلہ کننگا کہ الیکشن کمیشن گچین کاری کرفنگ کن تیار ءِ‘ سپریم کورٹ نا فیصلہ غا پورو عملدرآمد کننگک۔ الیکشن کمیشن تعلقدار ونگ آتے پنجاب اٹ گچین کاری تا تیاری تے ترند کننگ نا پرمان کرے۔ الیکشن کمیشن نا حوالی نا رد اٹ دیوان اٹ پنجاب نا نگران حکومت تون رابطہ نا فیصلہ ہم کننگانے‘ نگران حکومت تون انتظامی و سکیورٹی باندات آتیا سلابت کننگک‘ داکان بیدس الیکشن کمیشن فنڈ ہلنگ کن وزارت خزانہ تون ہم رابطہ کننگ نا فیصلہ کرینے۔ الیکشن کمیشن ناکنڈآن سپریم کورٹ نا فیصلہ نا رد اٹ پنجاب اسمبلی نا گچین کاری تا شیڈول جاری کننگانے‘ جاری کروک اعلامیہ نا رد اٹ نوٹیفکیشن نا رد اٹ اپیلیٹ ٹریبونل اپیل تیا فیصلہ 17 اپریل اسکان کیک و اومیتدار آتا اولسرجاچ ہلوک مہشون 18 اپریل آ جاری مریک‘ پندار کاغد آتے پدی ہلنگ نا گڈیکو تاریخ 19 اپریل مریک و اومیتدار آتے گچین کاری نشانک 20 اپریل آ جاری مریرہ۔ پنجاب اٹ گچین کاریک 14 مئی آ مریرہ‘ پندار کاغد آتے ٹی اپیل دائر کننگ نا گڈیکو تاریخ 10 اپریل مریک۔

(آن لائن)