اپریل آ بھٹو نا عدالتی خون مس، اینو انصاف نا، شہباز شریف

اسلام آباد: وزیر اعظم میاں شہباز شریف پارینے کہ چار اپریل آ بھٹو نا عدالتی خون مس اینو ولدا انصاف نا خون کننگانے‘ کیس انا فیصلہ کروک اسہ جج اس ہم دا ہیت ءِ امنا کرینے کہ انصاف نا خون مس۔ دا خیال آتا درشانی ءِ او شنبے نا دے قومی اسمبلی نا دیوان اٹ کرے‘ دیوان اٹ وزیراعظم شہباز شریف نا درخواست آ مسکوہی وزیراعظم ذوالفقار علی بھٹو نا ایصال ثواب کن دعا کرفنگا‘ مولانا اسعد محمود دعا کرے۔ قومی اسمبلی نا دیوان اسپیکر قومی اسمبلی راجہ پرویز اشرف ناکماشی ٹی اڈہلک۔ وزیراعظم میاں شہباز شریف پارے کہ وزیرکانود ہرا وڑ پارے کہ کابینہ فیصلہ کرینے کہ دوانزدہ سال آن پد تموک ریفرنس نا بایدے فیصلہ مرے‘ مسکوہی وزیراعظم شہید ذوالفقار علی بھٹو نا بابت مچ آدنیا ٹی جوان ءُ پامداری اس ارے‘ مسکوہی وزیراعظم نا عدالتی خون مسوسس۔ فیصلہ کروک اسہ جج اس تینا یادداشت اٹ دا ہیت ءِ منا کہ مسکوہی وزیراعظم 73ء نا آئین نا جوڑ کروک نا حکومت ئس۔۔73ء نا آئین ہمو حکومت اٹ جوڑ مسوسس‘ دا پاکستان نا تاریخی خذمت اس ئس ہرادے مدام یات تخنگک۔ تاریخ نا امر ءُ بیداد اسے کہ اینو ہم چار اپریل ءِ‘ عدالتی خون اینو نا دے مریک اینو چار اپریل آ 72 گھٹنہ ٹی ہرا کارروائیک مسر‘ او عدل وانصاف نا خون مس ہرانا اخس کہ مذمت ءِ کننگے کم ءِ‘ ای نم تون ہیت کننگ اٹی اٹ کہ ذوالفقار علی بھٹو کن دعا کننگے۔ مولانا اسعد محمود مسکوہی وزیراعظم ذوالفقار علی بھٹو شہید نا ایصال کن دعا کرے۔

(آن لائن)