بنجائی کابینہ سپریم کورٹ نا گچین کاری تا بابت فیصلہ ءِ مستردکرے

اسلام آباد : بنجائی کابینہ سپریم کورٹ نا گچین کاری تابابت فیصلہ ءِ مسترد کرے۔ سپریم کورٹ نافیصلہ ءِ اقلیتی گوندا۔ وزیراعظم شہباز شریف ناکماشی ٹی بنجائی کابینہ نادیوان اڈ ہلک‘ نا باسک آتا رد اٹ دا فیصلہ غا عمل مننگ کپک‘ حوالی نا رد اٹ آئین وکانود آن ایڑتر دا فیصلہ کننگا۔ حکمران جماعت نا وکیل آتے ہیت انا موکل ہم تننگتو‘ داباندات ءِ پارلیمنٹ تون اوار کل تعلقدار فورم تیا چست کینہ‘ کابینہ نادیوان اٹ آئینی و کانودی امور تے ٹی چندی آپشن تیا سجفنگا‘ بنجائی کابینہ سپریم کورٹ انا اقلیتی بنچ انا فیصلہ غا گڑتی درشان کرے۔ وزیرکانود نا کنڈآن فیصلہ غا بریفنگ آن پد حکومت پوسکن ءُ حکومت عملی اس جوڑ کیک۔ دا رد اٹ وزیر کانود اعظم نذیرتارڑ سپر یم کورٹ نافیصلہ غا گڑتی درشان کرسا پارینے کہ سپریم کورٹ سیاسی جماعت و وکیل تنظیم آتا خواست آ سجفتو‘ فیصلہ غا بس ارمان کننگ کینہ۔ سینئر جج ٹے کل باندات آتیان مُر تخنگ انگ ءِ۔ ہندن لگنگ اٹی ءِ کہ عدالت ءِ اِرا بشخ اٹ ونڈ کننگانے۔ سپریم کورٹ نافیصلہ غان گڈ پریس کانفرنس کرسا وزیرکانود پارے کہ گچین کاری تاریخ نا فیصلہ تون اوار چیف جسٹس جسٹس فائرعیسیٰ نا فیصلہ غا سرکلر یا ایگزیکٹو آرڈر نا جاگہ غا 6باسکی بنچ ٹہیفینے‘ ہراٹی جسٹس اعجاز الحسن و جسٹس مظاہر علی اکبر نقوی ہم اوار ءِ‘ و دا بنچ انا کماشی ءِ ہم ہمو جج کننگ اٹی ءِ ہرا مہالو آن جھیڑہ ئی ءِ‘ دا بینچ جسٹس قاضی فائز عیسیٰ نا فیصلہ نا جاچ ءِ ہلیک‘ ننا بڑزکو عدلیہ ونڈ مسنے‘ ونڈ مننگ نا تاثر ءِ چٹفنگ عدلیہ نا سروک نا زمواری ءِ‘ تدوک آدے مسہ باسکی بنچ انا فیصلہ غا ڈکھ‘ ارمان کننگ کینہ۔ یکم مارچ انا فیصلہ چار انا گیشتری اٹ خارج مسوسس‘ بھاز اہم انگا باندات ءِ ایسر کننگ کن فل کورٹ دیوان نا خواست کریسن۔ ابہام ءِ چٹفنگ کن فل کورٹ ءِ تولفنگاکہ ولے سکیورٹی و زرگزرانی تون اوار سیاسی و کانودی تنکی ہم اوار کننگانے۔ سپریم کورٹ حکومت نا کل درخواست آتے مسترد کرے‘ حکومتی سیوت سپریم کورٹ نا باندات آتیان است جم اف‘ او پارے کہ سپریم کورٹ نا پیشن آ ترازو نا نشان ءِ اونا ہڑتوم کنڈآک بریبر ءُ ویل انا ایسر بیرہ جم سوچ اٹی ءِ‘ ویل ءِ ایسر کننگ کن فل کورٹ دمدستی جوڑ کننگے داسہ شش باسکی بنچ آ ہم ہور ہرفنگ انگ ءِ‘ پارلیمان ہم اسہ مقننہ ءُ ادارہ اسے و عدالت عظمی ہم شرفمند ءُ ادارہ اسے‘ ارمان نا ہیت دادے کہ سینئر جج آتے کل باندات آتیان مُر تخنگ انگ ءِ‘ منہ شرفمند جج ءِ دا وڑ انا بنچ آتا بشخ جوڑ کپننگ انگ ءِ‘ ہندن لگنگ اٹی ءِ کہ عدالت ءِ اِرا بشخ اٹ ونڈ کننگانے۔ کل ءِ اسیجا تولف فیصلہ کر گڑا نا فیصلہ نا واکداری ءِ کس اس چیلنج کننگ کپک‘ اگہ اینو امنائی اف تو دا ملک وقوم اکن جوان ءُ گڑاس اف‘نن تینا سلاہ تے ایلوفتیا بیٹ کپنہ‘ جم سوچ اٹ فیصلہ کننگک۔

(آن لائن)