ملازم آتا ساڑی مفننگ آن محکمہ غاتا کارکڑد زہمی مریک، ولی کاکڑ

کوئٹہ : گورنر بلوچستان ملک عبدالولی خان کاکڑ ملوک آ دا حوال و غاوتیاگڑتی نا درشانی ءِ کرے کہ صوبہ نا چندی ضلع غاتیٹی چندی محکمہ غاتا آفیسر، ڈاکٹر و ملازم صوبائی دارالحکومت کوئٹہ آن بیدس تینا تعیناتی نا جاگہ غا باقاعدگی اٹ ڈیوٹی تفننگ ءُ۔ سرکاری کارندہ غاتا ساڑی مفننگ و غیر فعالیت نا سوب آن محکمہ غاتا کارکڑد زہمی مریک و مخلوق ءِ بنداوی آسراتی تا فراوانی و وخت آ ویل آتا ایسری اٹی اڑاند ودی مریک۔ داخیال آتا درشانی ءِ او گورنر ہاؤس کوئٹہ ٹی چندی ڈل آتون گپ وتران کرسا کرے۔ داوخت آ گورنر بلوچستان پارے کہ صوبہ بلوچستان بیرہ کوئٹہ شار اسکان اف و اگہ سرکاری ملازم، ڈاکٹر و آفیسر وایلو ڈسٹرکٹ آتیٹی تینا فرض ءِ دیانتداری اٹ سرتفسہ تو نئے شونداری مریک و نئے الس نا ویل آک ایسر مریرہ، اوخبڑدار کرے کہ حکومت السی ویل و مشکل آتے ایسر کننگ اٹ سنجیدہ ءِ و سرکاری کارندہ غاتا کنڈآن فرض انا ادائیگی ٹی ڈیوالئی ءِ سگپنہ، مجاز کمامدار آک ہرحال اٹ سرکاری کارندہ غاتا ڈیوٹی نا ہند آ ساڑی گری و فعالیت ءِ پک کیر و حکومتی پالیسی آ عملدرآمد اٹی منہ بندغ ءِ خوش تخنگ نا جاگہ غا چناتا آخبت ءِ رکھ کننگ آ سنجیدہ چکار کننگے۔ گورنر بلوچستان ملک عبدالولی خان داہیت آ ڈکھیائی نا درشانی ءِ کرے کہ بلوچستان نا پسماندگی و نیزگاری آن جوانی اٹ بلد تعلیم یافتہ ڈاکٹر صاحب آک ہم تینا تینا ڈسٹرکٹ آتیا ہِننگ کن تیار افس ہراٹی جان جوڑی نا ویل گھمبیر مرسا کننگ ءِ داتسکان کہ دا شون ہلوک دور اٹی بلوچستان اٹی زچہ و بچہ نا مرک آتا کچ غٹ آن بڑز ءِ۔

(اے پی پی)