بلوچستان یونیورسٹی اسہ وار ولدا مالی تنکی نا گواچی، کل کاریمک بارّسر

کوئٹہ: بلوچستان یونیورسٹی اسہ وار ولدا مالی تنکی ناگواچی مسنے‘ استاد‘ ملازم و جامعہ نا افسر آتیا ساڑی ایکشن کمیٹی کل بشخ آتے بندکرسا امتحان تا بائیکاٹ کرسا ارٹمیکو دے ہم برانز ءِ برجا تخا۔ ایکشن کمیٹی ٹی اوار استاد آتا نمائندہ تنظیم اکیڈملک اسٹاف ایسوسی ایشن یونیورسٹی آفیسرز ایسوسی ایشن و بلوچستان یونیورسٹی ایمپلائیز یونین جامعہ نا ٹرانسپورٹ تون اوار کل بشخ آتا دفتر آتے بند کرے و مون ءُ بیرک چست کرے۔ ایکشن کمیٹی نا موقف ءِ کہ جامعہ نا استاد و ملازم آتے اِرا تُو آن رسینگتنے‘ تنخواہ رسینپننگ‘ پدتموک پروموشن، اپ گریڈیشن، ٹائم اسکیل کیس، یونیورسٹی ایکٹ اٹ ترمیم، جامعہ نا باڈی تے ٹی ایسوسی ایشن تا نمائندگی جامعہ ءِ مون تروک مالی و انتظامی تنکی آ جوائنٹ ایکشن کمیٹی ناکنڈآن وائس چانسلر نا دفتر آن یونیورسٹی نا مین گیٹ اسکان ریلی اڈ تننگا۔ شریدار آک وائس چانسلر ءِ برطرف کننگ و بند تنخواہ تے جاری کننگ نا خواست کریر و تینا خواست آتا حق اٹ نعرہ خلکر۔ ایکشن کمیٹی نا راہشون ڈاکٹر کلیم اللہ‘نذیر لہڑی‘شاہ علی بگٹی وایلوفک پاریر کہ برانزی تحریک ءِ پین ودفنگ تون اوار کل دفتر‘ شعبہ امتحانات، کلاس ٹرانسپورٹ ءِ پورو وڑ اٹ بند و خواست آتا پوروی اسکان بی اے بی ایس سی نا امتحان تا بائیکاٹ برجا سلک۔ ہائیر ایجوکیشن کمیشن علم و پٹ وپول نا بنداوی بشخ انا فنڈ آتے ہم کاٹ کرینے‘ ہندا وڑ بنجائی حکومت اٹ صوبہ ناچار ارب روپئی نا گرانٹ ءِ جاری کے تاکہ مقدس آ تُو اٹ تنخواہ رسینپننگ آن فریشان استاد آتے فریشانی تیان کشسا خواننگ و خوانفنگ نا عمل دوارہ بنا کننگ کے۔

(آن لائن)