پاکستان و سعودی عرب ہر وڑ اٹ تین پہ تین گنڈوک ءُ، راجہ پرویز اشرف

اسلام آباد: اسپیکر قومی اسمبلی راجہ پرویز اشرف تون سعودی سفیر نواف بن سعید المالکی سے شنبے نادے آ پارلیمنٹ ہاؤس اٹی اوڑدہی کرے ہراٹی ہڑتوم آ کنڈآتا تعلقداری تون اوار تین پہ تینی است خواہی نا ایلو امور تا بارواٹ گپ وتران کننگا۔ اسپیکر سعودی سفیر تون گپ وتران کرسا پارے کہ پاکستان و سعودی عرب نا نیام اٹ برادرانہ تعلقداری مذہب،دودوربیدگ واسیجائی روایت آتا سوگو رشتہ غاتیٹی تفوک ءُ۔ ہڑتوم آ ایلم ملک آک آزمائشت نا ساہت اٹی اسہ ایلو تون سلیسنو۔ اوپارے کہ پاکستان نا الس و حکومت حرمین شریفین نا متولی و سعودی سرکڑدہ غاتا بے پناہ شرف ءِ کیرہ، سعودی عرب مدام پاکستان نا راجی و اقتصادی شونداری ٹی است انا حب اٹ کڑد ادا کرینے۔ اونا پاننگ ئس کہ پارلیمانی ڈل آتا ہن و بر علاقائی شونداری کن المی ءِ، پاکستان سعودی عرب تون ہڑتوم آ کنڈآتا واپار ءِ ودفنگ کن سنبرینگوک ءِ، تین پہ تینی فائدہ کن چندی بشخ آتیٹی کمکاری المی ءِ۔ اسپیکر پارے کہ پاکستان نا پارلیمنٹ ہڑتوم آکنڈآتا برادرانہ تعلقداری تے پین سوگو کننگ کن سبنرینگوک ءِ، پارلیمانی ڈل آتا ہن و بر آن ہڑتوم آملک آتا نیام اٹ ہڑتوم آ کنڈآتا تعلقداری تے پین مون آ دننگ ملک۔ سعودی سفیر پارے کہ سعودی عرب پاکستان تون تینا تعلقداری تے بھاز اہمیت ایتک، سعودی عرب پاکستان ءِ تینا مخلص سنگت و با پت ایلم تکک۔ اوپارے کہ سعودی عرب نا اقتصادی شونداری ٹی پاکستانی پردیسی تا کڑد ستاکڑزک، ہڑتوم آملک آتا نیام اٹ چندی بشخ آتیٹی کمکاری نا مون آ دننگ ستاکڑزک۔

(اے پی پی)