سپریم کورٹ نا پنجاب اٹ 14 مئی آ گچین کاری کرفنگ نا پرمان

اسلام آباد: پنجاب و خیبرپختونخوا گچین کاری التوانا کیس اٹی سپریم کورٹ الیکشن کمیشن آف پاکستان نا فیصلہ ءِ کالعدم گوندسا 15 مئی اسکان گچین کاری کرفنگ نا پرمان کرے۔ سپریم کورٹ پنجاب و خیبرپختونخوا ٹی گچین کاری تا التوانا بابت کیس انا فیصلہ ءِ بنفسا الیکشن کمیشن نا 8 اکتوبر 2023ء آ گچین کاری کرفنگ نا فیصلہ ءِ کالعدم گوندانے۔ سے شنبے نادے آ داڑے چیف جسٹس آف پاکستان جسٹس عمرعطاء بندیال نا کماشی ٹی عدالت عظمیٰ نا مسہ باسکی بنچ کیس انا فیصلہ ءِ بنفے۔ چیف جسٹس قرآن پاک نا آیت ءِ خوانسا بنائی فیصلہ ءِ بِنفنگ نا بناءِ کرے۔ فیصلہ ٹی چیف جسٹس پارے کہ کیس انا سرجم فیصلہ ءِ ولدا جاری کننگک۔ تینا فیصلہ ٹی عدالت عظمیٰ الیکشن کمیشن نا 8 اکتوبر 2023ء آ گچین کاری کرفنگ نا پرمان ءِ غیرآئینی گوندانے۔ فیصلہ ٹی مستی پاننگانے کہ الیکشن کمیشن نا 22 مارچ 2023ء نا فیصلہ ءِ غیر آئینی گوندنگک و صدر مملکت نا تروک آ الیکشن نا تاریخ نا فیصلہ ءِ بحال کننگک۔ سپریم کورٹ تینا فیصلہ ٹی گوندانے کہ آئین و کانود گچین کاری تا پدبٹنگ نا اختیار تفک۔ 22 مارچ آ ہراتم الیکشن کمیشن گچین کاری تے پدبٹنگ نا فیصلہ تس تو ہمووخت ا سکان گچین کاری عمل پنچ میکو ریسہ غا ئسک۔ الیکشن کمیشن نا پرمان نا سوب آن 13 دے زیان مس۔ الیکشن کمیشن غیر آئینی فیصلہ کرے۔ مستی پاننگانے کہ الیکشن کمیشن 8 اکتوبر آ الیکشن نا تاریخ ءِ ترسا تینا دائرہ اختیار آن گدرینگانے۔ تینا فیصلہ ٹی سپریم کورٹ گوندانے کہ 30 اپریل آن 15 مئی 2023ء نا نیام ٹ صوبائی گچین کاری تے کرفنگے۔ ریٹرننگ آفیسر نا فیصلہ نا برخلاف اپیل جمع کرفنگ نا آخیریکو تاریخ 10 اپریل مریک۔ 17 اپریل آ الیکشن ٹربیونلز اپیل آتیا فیصلہ کیک۔ یات سلے کہ سپریم کورٹ پاکستان تحریک انصاف نا درخواست آ پنجاب و کے پی کے گچین کاری تیٹی تاخیر کیس انا فیصلہ ءِ 6 سماعت آن پد تدوک آ دے ڈک کریسس ہرادے اینو بنفنگانے۔