پاکستان نا ہر چنا کشمیری تتون تفوک ءِ، شہباز شریف
ننے قومی فائدہ کن سیاسی خڑکی تے گیرام کرسا اسٹ مروئی تمک، کشمیر ایشو و آزاد کشمیر نا کل ویل آتے اوار تولسا ایسر کینہ، سیوت قومی ایشو تا ایسری نا اسٹ انگا کسر ءِ، وزیر اعظم
Get real time updates directly on you device, subscribe now.
مظفر آباد : وزیر اعظم شہباز شریف پارینے کہ پاکستانیک تینا کشمیری ایلم تا آجوئی نا جہد اٹ اوفتتون اوار سلوک مریک‘ ای تینٹ دنیا نا ہر جہانی فورم آ کشمیری تیا ہندوستان نا کنڈآن کروک بیدادی تے دنیانا مون آ پاش کریٹ‘ ننے قومی فائدہ کن سیاسی فائدہ غاتیان ایڑتر اسٹ مروئی مریک‘پاکستان نا ہر چنا کشمیری تا آجوئی نا جہد اٹ اوفتتون تفوک ءِ‘ اگہ نن ہنداوڑ قومی ایشو تیا سیوت کین تو کشمیر نا آجوئی مُر اف۔ دا خیال آتا درشانی ءِ وزیراعظم شہباز شریف مظفرآباد اٹ کل جماعتی حریت کانفرنس نا ڈل اتون اوڑدہی نا وخت آ کرے‘ کل جماعتی حریت کانفرنس نا راہشونک وزیرِاعظم پاکستان محمد شہباز شریف نا 5 فروری، یومِ یکجہتیِ کشمیر آ کشمیری تا نیام اٹ ساڑی گری ءِ کشمیر کاز کن ستا کڑزوک گوندار و وزیراعظم ءِ است انا ہُب اٹ جم وجوش اٹ بخیر پاریر‘ ڈل وزیرِاعظم ءِ اقوامِ متحدہ نا جنرل اسمبلی ٹی ہندوستان نا بیدادی تا داستان ءِ دنیا نا مون آ پاش کننگ و کشمیری تا توار ءِ دنیا اسکان سر کننگ آ خراجِ تحسین پیش کرے۔ داکان بیدس وزیراعظم شہباز شریف تون آزاد کشمیر نا سیاسی سرکڑدہ غاک اوڑدہی کریر‘اوڑدہی ناوخت آ وزیرِاعظم آزاد کشمیر سردار تنویر الیاس، چوہدی محمد یاسین صدر پاکستان پیپلز پارٹی آزاد کشمیر، شاہ غلام قادر صدر پاکستان مسلم لیگ ن آزاد کشمیر، سردار حسن ابراہیم خان صدر جموں کشمیر پیپلز پارٹی اوار ئس‘داڑتون اوار بنجائی خواجہ سعد رفیق، رانا تنویر حسین، مریم اورنگزیب، مرتضی جاوید عباسی وسلاہکار وزیرِاعظم قمر الزماں کائرہ ہم ساڑی ئس۔ آزاد کشمیر نا سرکڑدہ غاک ساڑی حکومت نا ذاتی استخواہی آ کشمیر کاز ءِ مون آ اتنگ آ وزیرِاعظم شہباز شریف ءِ خراجِ تحسین پیش کریر۔ داوخت آ وزیراعظم شہبازشریف پارینے کہ کیہی سیاسی وابستگی تیان پد ہم مچ آ ملک انا سیاسی سرکڑدہ غاتا اینو مظفرآباد اٹ کشمیر کاز کن اسیجا مننگ ستا کڑزک‘ ستمبر اٹ اقوامِ متحدہ نا جنرل اسمبلی نا دیوان اٹ ای تینٹ ہندوستان نا مقبوضہ کشمیر اٹ بیدادی تے مچ آ دنیا نا مون پاش کریٹ‘ داڑتون اوار کیہی دہائی آن ہندوستان کشمیر اٹ بیدادی کننگ اٹی ءِ ولے کشمیری تا وتواجہی نا جہدءِ چٹفنگ کتو‘اگہ ہندا وڑ سیاست ءِ اسہ کنڈ تخسا سیوت آن قومی ایشوتیا اسیجا مرین تو ننا کل ویل آک ایسر مریرہ۔ کشمیر ایشو و آزاد کشمیر نا کل ویل آتے اسیجا ایسر کینہ‘ پاکستان نم تون تفوک ءِ و مدام کشمیری تتون اوفتا جہد اٹ سلوک مریک۔ اسپیکر آزاد کشمیر قانون ساز اسمبلی و وزیرِاعظم آزاد کشمیر وزیرِاعظم نا 5 فروری یومِ یکجہتی کشمیر آ مظفرآباد آبننگ ءِ کشمیر کاز اکن اہم گوندسا اوناستاءِ کرے۔
(آن لائن)