پی ایس ایل 8 نمائشی میچ، کوئٹہ پشاور ءِ 3 رنز اٹ کٹا
کوئٹہ گلیڈی ایٹرز 20 اوور اٹی 5 وکٹ نا نسخان آ 184 رنز کرے، پشاور زلمی 7 وکٹ نا نسخان آ 181 رنز جوڑ کننگ کرے
کوئٹہ : کوئٹہ ٹی پاکستان سپر لیگ (پی ایس ایل) نا ہشتمیکو سیزن نا نمائشی میچ اٹ کوئٹہ گلیڈی ایٹرز پشاور زلمی ءِ 3 رنز اٹ کٹا۔ نمائشی میچ اٹ پشاور زلمی نا کپتان بابراعظم ٹاس ءِ کٹسا کوئٹہ گلیڈی ایٹرز نا برخلاف اول اٹ فیلڈنگ کننگ نافیصلہ کرے‘ کوئٹہ گلیڈی ایٹرز اول اٹ گوازی کرسا 20 اوور اٹ پشاور زلمی ءِ 185 رنز انا ہدف تس۔ 185 رنز انا تروک ہدف ناپد اٹ پشاور زلمی 7 وکٹ نا نسخان آ 181 رنز جوڑ کننگ کرے‘ پشاور زلمی نا کپتان بابر اعظم 18 گیند آ 23 رنز جوڑ کرسا آؤٹ مس۔کوئٹہ گلیڈی ایٹرز 20 اووراٹ 5 وکٹ نا نسخان آ 184 رنز جوڑ کرے، افتخاراحمد کوئٹہ گلیڈی ایٹرز ناکنڈآن 94 رنز انا اننگز گوازی کرے‘ کوئٹہ گلیڈی ایٹرز نا کپتان سرفراز احمد 4 رنز جوڑ کرسا آؤٹ مس وخت اس کہ کوئٹہ نا افتخار 94 و خوشدل شاہ 36 رنز جوڑ کرے۔ افتخار احمد پشاور زلمی نا وہاب ریاض نا آخری اوور اٹ 6 چھکہ خلسا اننگز ءِ جوان ءُ ایسر اس تس۔ پشاورزلمی نا کنڈآن وہاب ریاض مسٹ وخت اس کہ عامر جمال و اسامہ میر اسہ اسہ وکٹ ہلکر۔وزیراعلیٰ بلوچستان میر عبدالقدوس بزنجو نمائشی کر کٹ میچ انا سَند تننگ نا دود آن تران کرسا پارینے کہ اینو ٹیم اسے نا آخا بلکہ پاکستان بلوچستان و کشمیر کاز سرسہب مسنے‘ میچ ءِ سرسہب کننگ کن بلوچستان نا الس پی سی بی گوازی گر و سکیورٹی فورس کل تینا کڑدار ءِ ادا کریر‘ میچ انا سرسہب اڈتننگ و ایسر ملک دشمن آتیکن پیدوار ءُ کلہو اسے کہ بلوچستان نا الس پرامن و محب وطن ءِ‘ صوبائی وزیر عبدالخالق ہزارہ زمرک خان اچکزئی نصیب اللہ مری چیف سیکرٹری عبدالعزیز عقیلی آئی جی پولیس عبدالخالق شیخ کوئٹہ گلیڈی ایٹرز نا مالک ندیم عمر پی سی بی نا آفیشلز پنی آ کرکٹر جاوید میانداد و محمد یوسف ہم دا وخت آساڑی ئس۔ وزیراعلیٰ پارے کہ اینو بلوچستان نا غیرتی آ الس بھلو کچ اسے ٹی اسٹیڈیم آ برسا تاریخ اس نوشتہ کرینے و کرکٹ نا گوازی تون تینا استخواہی تا درشانی ءِ کرے۔ او پارے کہ بلوچستان اٹ امن بسنے‘ الس داسہ بے ایمنی تالان کروک آتے سگنگ کپک‘ بلوچستان ناالس نا منتوار ان کہ او امن ءِ برجا تخنگ کن بنداوی کڑدار ادا کرے۔ وزیراعلیٰ پارے کہ داسہ بلوچستان اٹ کرکٹ نا درگہ گاک ملنگانو۔ پی سی بی تون ہیت کیوہ کہ کوئٹہ ٹی کر کٹ گو تا چرجوئی ءِ برجنا تخنگے۔ وزیراعلی پارے کہ ای قومی کر کٹ ٹیم انا منتوار اٹ کہ او جہانی میچ آتے ٹی کوئٹہ نا میچ ءِ اولیت تس‘ ہڑتوم آ ٹیمک جوان گوازی کرسا کرکٹ ہُروک آتے خوش کریر۔ وزیراعلیٰ پارے کہ اینو ہر بندغ اٹ حب الوطنی خننگاکہ۔ پولیس محکمہ داخلہ انتظامیہ و ایف سی نا کارکڑد ستا کڑزک۔سیکیورٹی ادارہ غاک دے و نن خواری کرسا پرامن چاگڑد اٹ میچ انا اڈ تننگ ءِ پک کریر۔ داکان مست کوئٹہ گلیڈی ایٹرز نا کپتان سرفراز احمد پشاور زلمی نا کپتان بابر اعظم و مین آف دی میچ افتخار احمد ءِ ٹرافی تس وخت اس کہ وزیراعلیٰ و صوبائی وزیر گوازی عبدالخالق ہزارہ گوازی گر و آفیشل آتے شیلڈ تس۔
(مانیٹرنگ ڈیسک/ خ ن)