مسکوہی صدرپاکستان و آرمی چیف پرویز مشرف دنیا ءِ اِلا
مسکوہی صدر دبئی ٹی امریکی ہسپتال اسے ٹی درمان مسکہ، بھلو وخت اسے آن ناجوڑ ئس
Get real time updates directly on you device, subscribe now.
اسلام آباد / راولپنڈی/ کوئٹہ : پاکستان نا مسکوہی صدر و چیف آف آرمی اسٹاف جنرل پرویز مشرف دنیا ءِ الا۔ پرویز مشرف متحدہ عرب امارات نا شار دبئی ٹی کزیت کرینے اونا درمان دبئی ٹی امریکی ہسپتال اٹ مسکہ و او بھلو وخت اسے آن ناجوڑ ئسکہ‘ عسکری حوالی نا کنڈآن ہم مسکوہی صدر نا کزیت نا خبر ءِ پک کننگانے‘ پک گمان دادے کہ مسکوہی آرمی چیف نا میت ءِ پاکستان آ اتنگک‘ حوالی نا رد اٹ مسکوہی صدر پرویز مشرف ءِ راولپنڈی نا آرمی قبرستان اٹ جہہ وجاگہ کننگک۔ پاکستان نا عسکری سرکڑدہ غاک مسکوہی صدر جنرل ریٹائرڈ پرویز مشرف نا کزیت آ ارمان کرینو۔ پاک فوج انا شعبہ تعلقات عامہ (آئی ایس پی آر) نا رد اٹ پرویز مشرف مسکوہی صدر، مسکوہی جوائنٹ چیفس و آرمی چیف مسنے۔ آئی ایس پی آر نا رد اٹ چیئرمین جوائنٹ چیفس آف اسٹاف کمیٹی جنرل ساحر شمشاد مرزا و آرمی چیف جنرل عاصم منیر مسکوہی صدر پرویز مشرف ناکزیت آاست ہسونی درشان کرینو۔ چیئرمین جوائنٹ چیفس آف اسٹاف کمیٹی و آرمی چیف ہڑزخواہی بیان اٹ پارینو کہ اللّٰہ ایماندار جنرل ریٹائرڈ پرویز مشرف ءِ جنت اٹ جاگہ ایتے(آمین)۔ وزیراعلیٰ بلوچستان میر عبدالقدوس بزنجو مسکوہی صدر جنرل پرویز مشرف ناکز یت آاست ہسونی نا درشانی کرینے تینا ہڑزخواہی بیان اٹ وزیراعلیٰ پارینے کہ جنرل پرویز مشرف نا کزیت آ ارمانی مسٹ‘ اللہ تعالیٰ ایماندار نا مغفرت ءِ کے‘ وزیراعلیٰ ماتنی خاہوت تون است ہسونی و ہمدردی نا درشانی کرسا اوفتیکن صبر انا دعاکرینے۔
(آن لائن)