وزیر داخلہ میر ضیاء مظفر آباد اٹ کشمیری تا مخ تفی کن اڈ تروک ریلی ٹی بشخ ہلک

مظفر آباد کشمیر: صوبائی وزیر داخلہ میر ضیاء اللہ لانگو یوم یکجہتی کشمیر نا وخت آبھارت نا غیرکانودی کوزہ گیری‘ جموں کشمیر نا محکوم الس تون یکجہتی نا درشانی کن مظفرآباد اٹ اڈ تروک ریلی ٹی صوبائی حکومت ناکنڈآن بشخ ہلک‘ ہراٹی مخلوق نا بھلو کچ اس بشخ ہلک۔ وزیرداخلہ بلوچستان میر ضیاء اللہ لانگوریلی نا شریدار آتتون دو انا زنجیر جوڑ کرسا کشمیری الس نا بھلا قربانی تیا اوفتے خراج تحسین پیش کرے و اوفتتون یکجہتی نا درشانی کرے۔ وزیر داخلہ بلوچستان میر ضیاء اللہ لانگو پارے کہ اینو 22 کروڑپاکستانی الس‘ آزاد جموں کشمیر نا 41 لکھ بندغ و گلگت بلتستان نا 16 لکھ رہینگوک آک مقبوضہ جموں وکشمیر ناغیرکانودی بھارتی کوزہ گیری آن آجوئی نا عہد کننگ اٹی ءُ۔ وزیرداخلہ بلوچستان میر ضیاء اللہ لانگو پارے کہ نن اینو دا ہیت انا عزم ءِ کننگ اٹی ان کہ بھارت نابرخلاف مزاحمت ءِ ہمو وخت اسکان برجا تخنہ تانکہ بھارت کوزہ کروک علاقہ غان پیش تمپ۔ اوپارے کہ پاکستان دنیا نااسٹ انگا ملک ءِ ہرا کشمیری الس نا پبی سیاسی‘ سفارتی واخلاقی مخ تفی ءِ کننگ اٹی ءِ ہراڑکن مقبوضہ جموں وکشمیر نا الس اوفتا منتوار ءِ۔

(خ ن)